Dr. Cungpi: Dothlennak caah lungrual tein tang usih

- Advertisement -

Dr. Biak Cung Lian: Ralkap duh lonak kan langhter, kan cawlcanghnak cu thla 2 leng a si cang. Hi thla 2 leng ahhin aho dah a lungrethei deuh, aho dah a thaba deuh ti ahcun ho hmanh nih dirkamh lomi, an thluak chungah zeihmanh um lomi, an kut cung ah hriamnam dah ti lo cun zeihmanh a ngei lomi le mi a that cuahmah mi ralkap phu hi an si.

Cucaah, mi a that cuahmahmi phu hi kanmah mipi nak in an lungrethei deuh. An ba deuh cang.

Atu lio ahhin nifatin thawngpang chia, thawngpang ttha lo kan hmuh, kan rel, kan ton hna.

Sihmanhsehlaw, hi thawngpang ttha lo hna nih hin kan cawlcanghnak, kan rianttuannak ah a dawnkhantu, kan rianttuannak a dirter tu siter hram hlah usih ti forhfial kan duh hna.

Atu tan kan tei khawh a si ahcun kum 70 leng kan pale, kan pule le kan pile nih an rak doh lengmang mi uknak ttha lo, cun an rak manh lengmangmi Federal Democracy cu kan ngah cang lai.

Mah kan ngah khawh nak ding ahcun atu lio ahhin lungsau tein le fimkan tein khuakhan i hnuhmai zoh in kan kal a biapit tuk caan a si.

Cucaah, kan zapi tein lungsau tein um hna usih. Lung i rual usih. Khat le khat thachiatternak, khat le khat i dehcawhnak, khat le khat i namnehnak mipi karlak ah um hram hlah seh. Mipi kan him a hau.

Hakha huap in kan zoh ahcun a luancia thla 2 chung kan cawlcanghnak ah thisen a luang rih lo. Cucu, a kan hruaitu mino hruaitu hna, upa hna le Khrihfa pastor te an cawlcanghnak ruangah tampi aa tel. An cungah lunglawmhnak tampi kan ngei.

Cun, a ra lai dingmi kan cawlcanghnak hnga ding zong ahhin aho hmanh thisen luanter kan i siang hna lo. Federal Democracy ngah nak dingah aho hmanh nun thap ding kan in siang hna lo.

Hitin ka chim tikah kan ralchiat ruangah a si lo. Nun thap hnawh in hmai a nur cuahmahmi mino le hruaitu tampi an um.

Atu tein siiawi zongin siseh, eidin tirawl zong siseh, a herh ahcun rak i timlam cio hna uh. Cuti ti tikah tthihpheihnak a si lo.

Khat le khat kan dirtti hna lai. Khat le khat ready tein kan um tti hna lai timi caah thapeknak le ralrin peknak a si.

Aho hmanh hi ralpi kan tei hlan chung cu kan kir lai lo. Hmai kan kal thluahmah lai.

Hi ralpi kan tei dih hnu ahcun thleidannak a um lomi, khat le khat zawn aa ruat chinchinmi, khat le khat aa upatmi, khat le khat aa bawmchanmi, mipi sinah rian a ttuan i mipi awann a ngaimi cozah kan ser hna lai.

Eihmurnak a um lomi ram kan ser hna lai. A hlei in mipi humhimnak caah rian a ttuanmi ralkap phu, palek phu kan ser hna lai. Kan ram cu a nuammi ram, kan mah tein aa uk khomi ram ah kan ser hna lai. – HCFJ

Azi
Azi
Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cangmi asi.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...