Dawt Hlei Hniang nih minthan a rak i thok ka i a philh khawh lomi thil 2 a phuan

Dawt Hlei Hniang nih minthan a rak i thok ka i a philh khawh lomi thil 2 a phuan

Dawt Hlei Hniang: Dawt Hlei Hniang tiin mi zapi nih theihnak dingah a ka bawmchan biktu le a ka dirkamh pitu cu ka nulepa an si. Abiapi in ka nulepa hmanh ahhin ka nu hi a si.

Chin Miphun Ni ah ka voi khatnak bik stage cung hla ka rak sak a si. Biakinn chung ahcun ka rak sa lengmang ko. Mah ahcun kum 4 le cheu ka rak si. “Welcome to Chiland” timi hla sa ding ka rak si i, hlasak cu ka zuam/duh tukmi si ko nain ka thinphan tuknak ah hla ka philh sual lai, kaa palh sual lai ti ka rak phan tukmi kha atu tiang hi ka philh khawh lomi a si. Cun, mah stage cung ka dirmi kha a harbik tiah ka ruahmi si.

Kawlram pumpi ah Chinmi aiawh in hlasak ka rak i zuam lio zong ka philh kho hrimlo. Khualin fikfa lakah ka nu nih ka thlen a ka zah i, sml 1 hrawng sak haumi Kawl hla (Palih) ka rak cawng. An ca cu Kawl biathuk a si ruangah rel thiam a si lo caah ka fian khawhnak hnga ka nu nih Lai holh in a rak ka ttial piak. I cinken cikcek dingin ka rak cawng.

Hlasak zuamnak ahcun a thiambik ka si, pakhatnak pek an ka duh nain zulhphung an chiahmi ah hlasak aa zuammi cu Kawl nunphung le hlasaknak ah ken a haumi See neh Warr (chingching tiah a awnmi) kha aa ken lai ti a si. Hlasa tu nih hla a sak pah ah See neh Warr a tlaih lai ti a si.

Laitlang ahcun kan hmuh balmi zong si lo. An kenmi si zong ka thei lo. Cun, Kawlram khuapi ka phak avoi khatnak bik a rak si fawn. Laksawng pek lo le si kho lo an ti caah pakhatnak pek loin, cu hlan ah a um bal lomi special laksawng tu an rak ser i an rak ka pek.

Pakhatnak ngah ko ding mah te i tlaih lo ruang i ka ngah lomi kha ka lungfak tuk i hmai kum ah ka zuam tthan. Mah ahcun See neh Warr cu kaa tlaih khawh cang i pakhatnak cu ka ngah.

Kum 30 leng hla ka sa cang i Pathian thangthatnak hla ka sakmi ah ‘Lawmh loin ka um kho lo’ hi ka uar bik. Love song ahcun ‘Zunn Ngeih Hla’ hi ka uar bik.

Awttha Pi Dawt Hlei Hniang te chungkhar cu atu hi USA ram ah an tlawn lio a si. – CCN

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.