President hlun Donald Trump a ṭanh ngaimi le COVID-19 raikhamsi a zum lomi RC siangbawi Raymond Burke cu COVID-19 zawtnak zualhma ngai in sizung a phan i a thaw aa zat lo caah thawpeknak seh (ventilator) an bunh, tiah US media NBC News nih a thanh.

Zarhteni ahkhan siangbawi Burke a Twitter account ah, “Siangbawi Burke cu COVID-19 zawtnak in sizung a phan. Thawpeknak seh (ventilator) an bunh. Damlei a panh ko tiah sibawi nih an chim. Mah zawtnak in a zaw liomi vialte siangbawi Burke nih thlacam an bawmh ve hna,” tiah a chungkhat nih an ṭial.

Mah hlan August 10 ahkhan kum 73 asi cangmi siangbawi Burke nih, “COVID-19 zawtnak nih aa ka phak ve i rem tein kai din i ṭha taktak in kai thlop lio asi. Damlei ka panh cuahmah ko, zaangfah tein thlacam ka bawm ve uh. Pathian thiltikhawhnak hi zum ko hna usih. Pathian nih thluachuah in pe ko hna seh,” tiah a zawtnak kong Twitter ah a rak ṭial.

Siangbawi Burke hi cozah nih COVID-19 pulrai a tlangtlak ning a soisel ngaimi le raikhamsi nan i chun dih hrimhrim lai timi phungphai ser hlah uh a rak ti pengmi asi.

Kum 2020 May thla zong ah, “Raikhamsi cu duh/lo zongah i chunh dih dingin an tuah awk asi lo. Hremuknak a hmangmi cozah ziaza ngeih ding asi lo,” a rak ti. Mah pinah raikhamsi a ṭhat lonak kong thawngpang diklo zong a rak chim ve lengmang.

December thla zong ahkhan Donald Trump nawl aa cawn i COVID-19 zawtnak cu “Wuhan virus” a rak ti ve.

Cun, “Wuhan virus hi mi zeimaw nih thil ṭhalo tuahnak caah an hmanmi asi,” a rak ti fawn.

“COVID-19 ral chiakha teinak dingah hriamnam ṭha bik cu Jesuh he i pehtlaih asi,” a rak ti.

Charhchan: AP le NBC News