CNN thawngla Clarissa Ward nih Yangon khuapi Pyi Lam um 10 Mile Market (၁၀မိုင်စျေး) ah bia a halmi hna lakah nu 2 cu tu zingka ah palek nih an tlaih hna.

CNN thawngla Clarissa Ward a rat hlan, nizaan ahkhan palek an ra i mipi an tlerh hna, tiah market thil zuar pawl nih an chim.

Mah tlawmpal ahcun CNN thawngla pawl cu an hung phan i sangmi vialte nih umkheng tum in an don hna.

An tlaihmi nu 2 cu market ral ah a ummi mei thilri zuarnak Asia Light dawr ngeitu le a rianṭuantu an si.

“CNN thawngla nih minung 5 hrawng bia a hal hna,” tiah mit hmutu nih an chim.

“CNN thawngla Clarissa Ward le a rianṭuan hawi pawl nih bia an halmi hna lakah nu 2 an tlaih hna hnu ah, adang pawl zong a kan tlaih ve lai ti an phang i an zaam.

“Sangmi zong, tu zaan ah ralkap le palek nih kan sangah hnahnawhnak a kan pek lai ti thinphang in an um,” tiah an chimchap.