CNLD vs NLD by Salai Ceu Bik Thawng

- Advertisement -

CNLD vs NLD (Thimnak Cathluan Cuaithlainak)

Chin party (CNLD) 2020 Thimnak Cathluan (Election Manifesto) ah Dal 22 in policy 160 a um. Kan party FB page ah dal a changchang tein kan langhter. NLD Cathluan ahcun Dal 18 in policy 150 a um.

Tutan cu kan state mah tein uknak (federal) kong cuai kan thlai lai. Voi dang tawn bang NLD cathluan ahcun mah tein state i uknak mumal (federal policy) aa tel lo. Cuaithlai awk hmanh a um lo kan ti lai cu. “Democracy Federal Ram (Democratic Federal Union) kan ser lai” ti lawng a um. Zeitin dah kan ser lai timi policy/mumal aa tel lo. Tlangcung miphun le ramchung ral daihnak timi dal 1 cu a um ve. Nain a chungum caang 7 ningin a ṭhatnak kong le ral daih khuakhannak kong lawngte an si – Democracy Federal Ram ser kong cu ralkap le USDP hmanh nih an chim lengmangmi asi, thil thar asi lo.

Kanmah party cu mah tein state i uknak (federal) he pehtlai in mumal 17 kan ngei. State Phunghrampi 6 he cun 23 ti khawh asi. NLD party cu Phunghrampi remh dingin mumal 114 an rak chuahpi lio zong ahkhan federal mumal pakhat hmanh aa tel lo. NLD le USDP telh in Kawl party pawl nih federal kan cohlan an timi hi cu an kaa lawng si. North Korea hmanh nih a ram cu Democratic People’s Republic of Korea tiin min a pek. Min le tlangtar hi a biapi mi si lo.

Tlangcungmi nih kan duhmi federal hi an cohlan taktak ahcun;

  1. Miphun min in state min pek cio (Bamar state umter ve)
  2. State kip nih State Phunghrampi ngeih
  3. A taangmi nawlngeihnak (residuary power) hna kha state pek
  4. State vialte state chungah mahte khuakhan lairelnak (cozah tlaihnak nawl, upadi sernak nawl, bia ceih/khiahnak nawl) tling tein pek
  5. State cozah tangah state runvennak ralkap le state palek chiahnak nawl pek …

… ti bantuk pawl hi Kawl party pawl nih an party cathluan ah an telh maw? An cohlang maw? An cohlan ahcun keimah bak nih mee ka pek hna lai. NLD policy ahcun mipi a dawmi palek ser ding lawng aa tel. State palek sernak nawl aa tel lo. Dawt/lo nakin kan state ah nawl ngeih hi kei cu ka duh deuh.

Kanmah tlangcung miphun hna zong nih, dur a kan piah cangka in (a chungah khuaitizuu a um/lo hmuh loin) fawi tein i zumh lo hau cang. Panglong ah a min menmen (khaungsin tiang lawng a simi) biatiam 9 a kan pek cangka in fawi tein kan rak i zumh caah kum 70 chung kan tuar cang … mah zong hi kum 70 chungah kan lungfim rih lo ahcun ….

Mah ruang cun ka chim lengmang, Kawlrawn ah Kawl tam deuh nih democracy party kha mee an pek ko lai. Mah zong cu ralkap uknak thlennak caah a herhmi asi.

Sinain, kan rampi ahhin mah pakhat lawng cun a za lo. Kan miphun caah, mah tein kan state i uknak (federal) caah le ral daihnak ca zongah kan ṭuan a herh ruangah miphun party pawl nih teinak hmuh ding le thazaang ṭhawn ding hi a herh tuk hringhran cang … (ka peh te lai)

Theihternak: CNLD General Secretary Salai Ceu Bik Thawng nih a FB ah Kawlca in a ṭialmi si.

Follow US

102,149FansLike
53FollowersFollow
731SubscribersSubscribe

Ṭial Tharmi

Malaysia ah Covid-19 mizaw thar 111 an hmuhchap hna

Tuni Malaysia ram ah Covid-19 zawtnak ngeimi 111 an hmuhchap hna. Zarh khat chungah mizaw a zaleng an hmuh hna hi voi...

Hakha University ah ni 14 chung khumherhmi minung 12 cu an ttinter cang hna

Chin state Covid-19 dohnak bu hruainak in Hakha khua chungah a rak lutmi paoh cu Hakha University ah ni 14 chung khumherh...

Malaysia biaceih zung nih kum 5 a fa pate a that tu nu le a tlangval pa thihdan a pek hna

Tuni ah Penang High Court nih kum 5 a fa pate a rak thattu hringtu nu le a tlangval pa cu hri...

Myanmar National Team ah ai tel mi Valte

Valte hi Kalymyo um Falam mi a si. 2010 kum ah Kalaymyo certual ah kan i hmu. Cu...
- Advertisement -