Ralkap nih cozah thar dirhnak ah rianttuan tti dingin Chin National League for Democracy (CNLD) party a sawm ve nain CNLD chairman Pu Ngai Sak nih party aiawh in a cohlang lo.
Mah kong ah mi tampi nih CNLD party le Pu Ngai Sak cu an thangthat len hna.
Ralkap nih rianttuan tti dingin CNLD Chairman Pu Ngai Sak sinah an sawm hna hi February 3 ahkhan a si i nizaan lawng ah an hun chim.
Nain, February 3 ah a si cang komi atu pi lawng i chin cu ruahawk tlak ngai a si a timi zong an um.
CNLD General Secretary Salai Ceu Bik Thawng “Tuni meeting kan tuahnak ah ralkap nih a kan sawm chap ahcun cohlan lo dingin bia kan chah cang,” tiah a chim.
Ralkap cozah lakmi kong ah CNLD nih February 4, 2021 ahkhan duh lonak cathanh zong a chuah cang.
Mipi thimmi cozah sin in nawlngeihnak a chuttu ralkap nih cozah thar an dirhnak ah rianttuan tti dingin tlangcungmi party le khua chung party pawl a sawm hna. A cohlang cangmi zong an um i a cohlang lomi zong an um ve.
Chin party pakhat si vemi Asho Chin National party cu ralkap nih cozah thar ah rianttuan tti dingin an sawm nain an duh lo. – Chin World
