Chin Miphun Ralkap (CNF/A) a ṭuanmi Salai Aik Thang nih, “CNA ralkap a phunphun in na kan soisel pengmi atu le tu ka theih lengmang,” tiah ngaihchia ngai in a chim.
“Kachin state ah an i kap cang, Kayin state ah an i kap cang. Chin state ah zei thawng hmanh kan thei rih lo. Dai zirziar in nan um. CNA/F hi a min lawng maw nan si? tiah na kan soisel.
“CNF/A nih Chin mipi na kan veng bal lo, nan kap ngam hna lo maw cu e kha e, tiah a phunphun in na kan soisel. Malaysia le ramdang ummi ko hi nan zual.
“Nain, a phunphun in na kan soiselmi hi kaa lawm ko.
“Nain, pakhat chimh kan duh hna. CNF/A nih kap hna usih law zei dah a chuak lai ti hi khua ruat uh.
“Kan kah hna i ral kan thawh ahcun Chin mipi harnak nan tong dih lai. Chin state um Chin mipi harnak nan tong dih lai ti kan hngalh caah asi.
KIA le Kawl ralkap i kah ruangah Kachin mipi tampi an thi, hliam an tong. Khuami tampi mitthli he ramtang ah an zaam. KNU le Kawl ralkap i kah ruangah Karen mipi tampi harnak an tong ve. AA le Kawl ralkap i kah ruangah Rakhine mipi tampi an thi, hliam an tong, ramtangah an zaam. CNF le Kawl ralkap an i kah ahcun zei dah cang lai ti cu ruah khawh si ko cang.
“Chinmi nih nan miphun CNF/A na kan thlanglamh i na kan soisel pengmi hi khua ruat deuh ulaw ṭha.
“CNF/A kan dirhmun zong hi nan hngalh cio ko lai ti ka zumh. Keimah cu chimnak nawl ka ngei lo. Hngalh a duhmi paoh cu kan sakhan ah rak ra uh, CNF/A ralkap lut ve ulaw nan hngalh dih ko lai. Zei tik paoh ah kan in don hna. Rat khawh asi. CNA ralkap pawl nih zei rawl dah kan ei ti hmanh nan hngal lai lo,” tiah a chim.
“Chin Miphun Lungrual Acu Cang” tiah ca zong a ṭial
“Atu kan boruak ahhin, Chin miphun dihlak kan i lungrual lo ahcun zeitik ah dah kan i lungrual ti hna lai? Atu hin i lungrual cang hna usih.
“Khat le khat i soisel cu ngol cang hna usih. Kaan nawl hna. Kan Chin ram i ralkap CNF/A hi kan si khawhnak lam cio in thazaang pe hna usih.
“US, Europe, Australia, tbk ram thumnak phanmi nih tangka thazaang in ṭuan usih, Chin ram ummi miphun dawtu mino hna nih thazaang in ṭuan usih.
“Timhcia in um cang hna usih,” ati.
