CNF/A ralkap Hmingthansanga Fambol @Hminga nih a dawtmi Chin miphun le ram caah a nunnak a pek.
Kan hnu Zarhpini (Oct 17) hrawng ahkhan Falam peng, Tlangzar khua pawng i kahdohnak ah a nunnak liam hi asi.
Nizaan lawngah chungkhar nih thawng an theih.
CNA ralkap hi ṭha tein an i pehtlai kho rua hna lo. CNA ralbawi bokhat Naing Htoo Lwin a thihmi zong caan saupi a rauh hnu, aruak a rawh dih hnu lawngah an theih.
Hminga apa cu Mizoram, Bualpi (Vanlaiphai lei Bualpi) khuami Pu Sang Hmung Fambol asi.
Hminga le apa Pu Sang Hmung Fambol cu Mizoram ah a chuakmi an si nain, Hminga apu (apa apa) hi Thantlang peng, Thau khuami asi.
Hminga hi a chuahkehnak Mizoram i apa sinah hnangam tein a um khomi si ko nain ‘Laitlang cu kan chuahkehnak ram asi, kan Chin miphun nih mahte khuakhan lairelnak le zalonnak federal state kan ngah khawhnak ding ahcun kan ti khawh ning cio in kan ṭuan cio a hau’ tiin kum 2019 ah CNA ah a lut.
A miphun le ram caah kum 3 a ṭuan hnu ah a nunnak tiang a pek.
Chin miphun le ram nih philh awk a ṭha lomi pasalṭha asi.
Hminga hi Saikah khua ah saupi a rak um i Saikah khuami nih an khuami bantukin an ruah vemi asi.
