October 24 ah CNF nih “a thi” tiin thawng a rak thanhmi Dr. Naing Htoo Lwin kha “a thi lo, a nung ko” tiah naite ah Kawl Ralkap nih an thlahmi CDF ralkap pakhat nih a chim.
Falam le Hakha kar i kahdohnak um hnu ah Dr. Naing Htoo Lwin cu CNF nih an pehtlai kho ti lo.
Falam le Hakha kar um Rialti khua ah October 23 ah miruak pakhat an hmuh.
Rialti khua ah miruak an hmuhmi cu Dr. Naing Htoo Lwin nih aa hrukmi thil he aa khah caah ‘amah asi ko’ tiin ‘a thi’ tiah thawng an rak thanhnak asi.
Nain, miruak cu a rawk tuk cang i a mui fiang ti lo, angki le bawngbi zoh in an rak chimmi asi.
Falam le Hakha kar i kah lio ahkhan Kawl Ralkap nih CDF minung pakhat an tlaih i diriam cikcek in an hrem hnu ah an thlah.
Amah nih cun, “Dr. Naing Htoo Lwin a thi lo. Keimah he thong a tla ṭimi kan si. A nung dam ko,” tiah a chim.
Dr. Naing Htoo Lwin cu atu hi Kawl Ralkap nih an tlaih thongthlak peng ko, ati.
Ref: Salai Tluang Te
