Wednesday, December 1, 2021

CNF ral a tuk lio ah tlangcung hriamtlai phu 8 cu Kawl Ralkap he NCA kum 6 tlinnak puai an tuah

Uknak firtu Kawl Ralkap nih ‘Rampumpi Kah Ngol Lungtlinnak Cahren (NCA) Kum 6 Tlinnak Puai’ a tuah i tlangcung hriamtlai phu 8 an kai.

Hriamtlai phu 8 Kawl Ralkap sinah puai an kaimi cu kan lungtling hrimhrim lo, tiah Rampumpi Duhlolanghternak Phu (GSCB) nih cathanh a chuah.

Kawl Ralkap he kan i kap lai lo tiin NCA cahren ah minsen a thumi hriamtlai phu 10 an um. Mah chungah phu 8;

  1. Restoration Council of Shan State (RCSS)
  2. Democratic Karen Buddhist Army (DKBA)
  3. New Mon State Party (NMSP)
  4. Karen Peace Council (KNU/KNLA-PC)
  5. Arakan Liberation Party (ALP)
  6. Pa-O National Liberation Army (PNLA)
  7. All Burma Students’ Democratic Front (ABSD) le
  8. Lahu Democratic Union (LDU) an kai.

“Hi bantukin NCA kum 6 tlinnak puai an kaimi hi hmasa ah ‘SAC he ramkhel biaruahnak tuah kan ngol chung’ tiin cathanh an rak chuahmi vialte he ai kalh dih,” tiah GSCB nih a sawh hna.

“Mah pinah, NUG le CRPH nih 2008 Phunghram an hrawhmi le anmah nih phungphai an thanhmi he zong ai kalh,” ati.

Mah puai a kai lomi Karen National Union (KNU) joint general secretary 2 hlun Pado Mann Mann zong nih, “NCA cu 2008 Phunghram chungah a ummi si caah mah lam hi zulh awk a ṭha lo,” tiah a chim.

“NCA kum 6 tlinnak cathanh an chuahmi zoh tikah, SAC an cohlan ti khawh asi. Cakei a thi cangmi an nunter ṭhan bantuk asi. Kawl Ralkap nih fak chinchin in a kan kah khawhmi zong asi.

“Hitin an kal ahcun, SAC nih Caankarlak Mipi Cozah phunphai zong a dirhte khawhmi asi, cucaah an thil tuah hi NUG an cohlan lo bantuk asi,” ati.

NCA minsen a thu vemi Chin National Front (CNF) cu atu hi Chin ram ah Kawl Ralkap he an i kah cuahmah liopi asi. NCA kum 6 tlinnak puai ah a kai lo.

Kawl Ralkap nih tlangcung hriamtlai phu dang pawl a leem hna i mah karlak ah a thazaang dihlak chuah in CNF le KNU a phomh hna ti khawh asi. Tlangcung hriamtlai phu tampi hi zei khua ko dah an ruah hnga?

- Advertisement -