Nizaan ah CNF/A nih Kawl Ralkap 6 an thah hna, tiah kan theih.
CNF/A nih nizaan October 13 ah Hakha khua pawngah Kawl Ralkap an kah hna.
CNF biachimtu Salai Htet Ni nih, “Myanmar ralkap 6 kan thah hna tiah kan ralkap pawl nih an chim, kan fehter kho rih lo,” tiah a chim.
An i kah lio asi rih caah hnu ahcun hi nak tampi an thahte men hna lai.
Nizaan kha Hakha um Kawl Ralkap tampi cu motor in Falam in a rami Kawl Ralkap don an i thawh. Hakha khua an chuah tlawmpal ah CNF nih an kah hna hi si.
Nizaan zingka ah Falam in ralkap tampi motor 10 leng le tank 2 in Hakha lei an ra. Zaanlei 5pm ah Falam ṭhiamṭhiam in motor 31 khat in ralkap tam taktak an ra chap.
Nain mah ralkap vialte cu atutiang Hakha an phan kho lo. Lampi ah an i tap. Falam le Hakha kar Rialti, Lungpi le Thlanrawn khua hrawngah an um lio asi.
Nizaan le tu zingka ah Rialti khua inn vialte an khangh dih. Baptist biakinn 1 zong an khangh.
Tuni ah Rialti khua lonh um Thlanrawn khua inn 6 an khangh chap. Thlanrawn khua pawngah kahdohnak a um. Falam khualu um Kawl Ralkap nih hriamnam in kahdohnak hmun cu voi 3 an kah. Hriamnam ngan thawng nih Falam khua ningpi in a hninh dih.
Nizaan ah Kawl Ralkap nih Lungpi khua inn an baoh hna i facang, chiti, cite, tbk an firpiak dih hna. Ar, vok, meheh, tbk zong an kah thah ei hna.
Falam le Hakha kar um Lungpi, Rialti, Thlanrawn, Taal le Tlangzar khuami vialte cu nizaan ahkhan an zaam dih cang.
October 12 ah Kalaymyo lei in motor 61 le tank 2 khat in Kawl Ralkap 700 hrawng Falam khua an phan. Falam lei an rat pah in Falam pengmi 2 an kah thah hna.
October 13 ah Kyaukhtu khua in motor 90 lengin Kawl Ralkap 1,000 leng Mindat khua an phan ve.
Mindat-Matupi lam a min i Kawl Ralkap nih an remh cuahmah. Mindat a phanmi ralkap pawl hi tam nawn cu Matupi lei ah kal dawh an si. CNF kan pale nih lam an hrawh chung haute men lai.
Hakha le Falam zongah ralkap tampi an um cia cang. Hi vialte ralkap hi Thantlang peng, Tlanglo khuataw ah ummi CNF zunglubik Camp Victoria sakhan lak dingin a rami an si, tiah Hakha Kawl Ralkap a zaammi Tin Lian Biak nih a chim.
Kawl Ralkap nih CNF le CDF tuk ningcang simanking an suaimi vialte cu Tin Lian Biak nih aa zaampi i CNF a pek hna. Tin Lian Biak a chungkhar cu Kawl Ralkap nih an tlaih hna.
Tu zingka ah Kawl Ralkap vanlawng 1 cu Mindat khua cungah a hung zuang. Matupi khua lei ah a lan.
