CNF le CHRO Telh In Ramkip Chin Upa Nih Malaysia Chinmi Kong An Ceih Lai

CNF le CHRO Telh In Ramkip Chin Upa Nih Malaysia Chinmi Kong An Ceih Lai

“Chin miphun caah ralzaam donghter” dingin June 13, 2018 ah UNHCR nih thawng a thanhmi cu leet ter dingin Malaysia khualipi Kuala Lumpur ah ramkip Chin upa pawl an ra lai.

August 13, 14, le 15 tiah ni 3 chung meeting an tuah lai i atu lio Malaysia le India um Chinmi kong, UNHCR nih Chinmi hlawt dingin biachahnak a tuahmi kong an ceih lai.

CNF le CHRO upa pawl zong an ra ve lai. Vawlei cung ramkip um Chinmi chungin bochanmi Chin upa pawl zong an ra hna lai.

Ni 3 chung meeting an tuah hnu ah ca an chuah lai i Malaysia le India um UNHCR le ralzaam bawmtu bu kip sinah an pek lai.

Malaysia le India ah Chinmi 40,000 leng an um rih.

2019 Dec 31 bakin Chin ralzaam donghter dingin UNHCR nih thawng a thanh caah 40,000 renglo Chinmi hna cu an hmailei kong ah lungrethei in an um.

“Tutan ah theipar ttha a chuah khawhnak hnga ramkip um Chinmi pumpak le khrihfabu cio nih thlacam kan bawm ko sawh u,” tiah ICC nih thlacam a cah.

Independent Chin Community (ICC) cu Malaysia um Chinmi caah rethei ngai in rian a ttuan pengmi si

ICC cu Chin ralzaam bu 5 (ACR, CRC, FRO, DAI le ZAM) pawl an i fonhnak bu a si. Malaysia um Chinmi vialte caah ruahnak, caan le thazaang dihlak in rian a ttuan zungzal.

ICC upa pawl nih bochanmi ramdang um Chin upa vialte phone an chawnh hna i ruahnak an hal hna hnu, June 20 ah Chin khrihfabu upa vialte Lautu Biakinn ah meeting an auh hna.

An meeting biachahnak bantukin June 29 ah UNHCR zungah “Chinmi thengte hlawt dingin bia na khiahmi hi kan lungtling hin lo, na biachahmi zoh tthan ko sawh..” tiah sandah an rak piah.

Sandahpiah khawh in ICC upa 5 nih UNHCR Lutlai Richard Towle zong an ton i “Chinmi hna caan sauhpiak dingin le ram thumnak kalter dingin” an rak nawl.

August 3 zongah ICC upa pawl, Delhi um CRC le CHRO le Asia Nuhrin Covo Bu 2 he i bawm in “UNHCR na biachahmi hi a dik lo, zoh tthan law leet” tiah cathluan an rak chuah.

Atu zongah ICC nih CNF le CHRO telh in ramkip um Chin upa pawl an sawm hna i ni 3 chung meeting tuah an timh hi si.

Be the first to comment

Leave a Reply

Your email address will not be published.


*