Falam in Hakha lei ah motor 40 lengin a kalmi ralhrang Kawl Ralkap pawl cu lam tanṭim ah kan Lai ralkap nih an kah hna i tampi an thah hna, 15 an hliam chap hna. Motor 7 an hrawhpiak hna.
October 14 ah Falam khua in a chuakmi tank 2 le ralkap motor 40 hrawng cu Hakha phak hlan Falam pengah CNF/A, CNDF le CDF nih October 14 le 15 ah an kah hna.
Ralkap motor pawl cu tu zingka 10am hrawngah Falam khua lei ah an kir nain Lungpi khua pawngah kan Lai ralkap pawl nih an kah ṭhan hna.
Kawl Ralkap pawl cu Falam-Hakha lam ah hmai nor kho lo le hnulei kir kho loin kan Lai ralkap nih cengceh bantukin an ceh hna.
Awlokchong in Falam le Hakha kar um Taal, Thlanrawn, Rialti le Lungpi khua ah inn an khangh hna i inn baoh in thil an fir hna. Thlanrawn khua inn 10 leng an khangh cang. Rialti khua inn vialte an khangh dih cang.
Mah bantukin Mindat-Matupi lam zongah Kawl Ralkap le CDF an i kap. Kawl Ralkap nih miakpi he hriamnam hme he an kah hna.
Tu zaanlei 4:20pm ah Mindat khua in Matupi lei ah ralhrang Kawl Ralkap motor 64 in an i thawh. Motor 20 ah khat tein ralkap an i cit. Adang pawl ahcun ralkap 2 cio lawng an i cit.
Ref: Khit Thit Media le Zalen
