CNF GS Pu Thla Hei nih Malaysia Chin mipi he tonnak ah a chimmi cheukhat

Chin National Front (CNF) General Secretary Pu Thla Hei cu tu zaanlei 1pm in 5pm tiang Kuala Lumpur um CCF Pudu biakinn ah Chin mipi he tonbiaruahnak a ngei. Pengtlang hruaitu upa le miphun ramkhel kong fian a duhtu mipi 40 hrawng an chuak kho.

Rakhine state tthang Asho/Khumi Chin upa 3 zong CNF GS bia ngaih ruah bakah an umnak Johor state khuakhua in an ra. Chin Refugee Committee (CRC) kan pale zong an ra.

Mifim kan ti cu a biachim a fiang taktak. Whiteboard ah Kawlram mepung a suai i Miphun Hriamtlai Bu (EAO) le CNF kong a chung muru tampi fiang taktak in a kan chimh caah meeting kaimi pawl an diriam taktak.

CNF upa chimmi pawl cu Ralkap nih Kawlca in an lehter tawn hna caah a chimmi cheukhat cu vawleipi theih in phozar awk an ttha lo, cucaah a tthami cheukhat lawng kan langhter lai.

Rampi Remdaih Khuakhannak (UPC or 21st Panglong Conference) kong

Kan pu Dr. Lian Hmung Sakhong nih “Federal le Mahte Khuakhan Lairelnak kan ngah lai zubui mei can aa duh bakah kan tlolh” a timi kha asi ko. Kan tlolhnak aruang cu;

  • Kawlram in kan chuak lai lo tiin minsen thut uh a kan timi le
  • Kawlram ah ralkap pakhat lawng um seh, tiin minsen thut a kan fialmi kan thut khawh lo caah si.

Khuazei ram paoh ah ralkap pakhat lawng um phung asi ko. Kawlram ah ralkap 1 lawng um hi kan lung a tling ko nain atu bantukin Kawl nih ukmi ralkap siter peng cu kan duh lo. Ralkap hi tlangcung miphun zong nih ttuan in uk ve hna seh ti kan halmi hna kha an duh lo caah kanmah hriamtlai bu zong nih kan lung kan tthul duh ve lo.

CNF General Secretary Pu Thla Hei

NLD nih cun anmah cozah tlaih chungah Rampi Remdaih Khuakhannak (UPC) tluang tein lim usih ti hi an duh tuk ve ko nain anmah le Ralkap kar ah hnatlaknak an ngeih khawh lo caah lo hma a kal kho lo.

Hmasa UPC meeting ahkhan NLD cozah nih ‘tlangcung miphun bu pawl nih nan duhmi paoh kan chim uh’ an ti caah federal le mahte khuakhan lairelnak ngah kan duhning kha kan chim cio. CNF zongin kan pu Dr. Lian Hmung Sakhong nih minutes 10 hrawng a chim ve. Tikah, a hmanung bik UPC meeting ahcun ceih awk zong an chuahpi kho huaha ti lo i Nu le Pa Tlukruannak kong lawng a tlangpi in kan ceih.

Atu hi UPC meeting cu tuah tthan dingin NLD acozah nih a kan chimh caah 2020 Thimnak hlan ah voi 1 cu tuah tthan dawh kan si.

KIA hmanh nih a thut lo lio ah CNF nih Rampumpi Kahngolnak Lungtlinnak (NCA) minsen a thutmi kong

Kum 70 chung hriamnam kan tlai cang nain zeihmanh a theipar a chuak kho lo, cozah he ramkhel biaruahnak tuah hrimhrim a hau cang. NCA minsen thut loin ramkhel biaruahnak tuah khawh asi fawn lo caah kan hawile hriamtlai bu dang nih cun thut an rak duh lo nain CNF telh in bu 8 nih cun ‘thut a ttha deuh ko’ kan ti caah kan thut.

CNF Regional Committee Chairman Pu Hniang Cung Thawng – kan pu nih a chimmi hi zaangfah tein media nih Video kan post piak hlah uh

2015 ah NCA minsen kan thut lio ahcun hriamtlai bu dang nih ‘Chin pawl hi zei cukha’ a kan ti len nain atu ah thut an i thawh cio ko cang hih. 2018 ah hriamtlai bu 2 nih an thut ve i atu cun a thumi bu 10 kan si cang.

KIA, TNLA, MNDAA le AA zong NCA minsen thut dingin atu hi cozah he an i ton cuahmah liopi asi.

NCA minsen kan thutmi chungah cozah le ralkap he lungtlinnak 51 kan ngei. Mah chungah Chin Miphun Ni zalong tein tuahnak nawl pek ding le Chin Miphun Ni cu Chin state ah ‘zung kharni (holiday)’ siter ding hna zong aa tel.

Chin state a tthancho khawhnak hnga airport pakhat tal cozah nih sakpiak ding le Chin state chung a cul dihmi highway lam sakpiak ding zong aa tel.

Minsen kan thut hnu in Chin State Day tiin kan tuah tawnmi cu Chin National Day tiin kan tuah khawh cang.

2020 Thimnak ahhin Chin state ah NLD maw CNLD a kai dah ttha deuh? – Mipi nih an halmi a lehmi hna

Kanmah CNF nih cun ttanhmi party kan ngei lo. Nain zei party kai dah a ttha deuh ti nan ka halmi cu aa… NLD a kai ahcun a ra laimi UPC meeting ah CNF dah lo Chin party pakhat hmanh an i tel lai lo.

CNLD nih MP an ngah ahcun UPC meeting ah ceih ding vialte a chuahpi tu bu UPDJC ah an i tel kho ve lai i UPC meeting ah an i tel khawh ve lai caah Chin miphun caah an lungthlitum tampi an chim/hal khawh ve lai.

That ti ahcun mah miphun a simi Chin party cu a ttha deuh henta. Nain CNF nih cun aho party hmanh ttanh le thleidan kan ngei lo.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.