“Atu kan ram ah ral a thawhmi hi Chin mipi nih ralzaam soknak caah le ram thumnak kalnak caah hmang hlah uh,” tiin Chin National Front (CNF) nih tunai ah cathanh a chuah.
“Ram buai lio Refugee kong he pehtlai in CNF lungput” tiin tunai ah cathanh a chuah i hitin ati hi si.
Chin state chung ral ruangah Chin mipi tampi an thi cang. Hliam tuarmi zong an tampi cang. Kan biakinn 24 leng le inn 500 hrawng khangh hrawhpiak kan tong.
Mah ruangah Chin mipi thong 70 (70,0000) leng nunnak kawl in ramtang, khua dang le ramdang (India ram Mizoram state) tiang an zaam hna i harsa taktak in an um lio asi.
Cucu CNF nih ‘ram thumnak kal dingin ralzaam sok hlah uh’ ati hna.
Cun, “Ram thumnak kalnak ralzaam sok dingin ahohmanh nih forhfial hna hlah uh, ram thumnak kal kho ding zongin ahohmanh nih bawm (advocate piak) hna hlah uh,” ati.
Chinmi le Ralzaam in ramthumnak kal
Kum 1962 ah ralkap bawi Ne Win nih mipi thimmi cozah uknak a chuh hnu in kan ram uknak a ṭhat lo caah Chin miphun cu pawcawmnak (nunnak) kawl in mi ramdang ah hawi duh lomi rian thurhnawm le rian har lahkhah tlawmte in kan ṭuan. Ralzaam hna kan sok i atu ahcun US ah minung thong 70 hrawng kan phan. Australia ah thong 15 hrawng kan phan, i kan fale zong vawlei cung university ṭhabik Yale, Stanford, tbk hna an kai kho ve. US ram ah mirum tampi zong an kan i chuah.
Atu lio kan ram buai ruangah nunnak kawl in ramtang, khua dang le ramdang (India ram, Mizoram state) ah a zaammi kan miphun cu ‘ralzaam sok in ram thumnak a phanmi Chin mipi’ nih an si khawh chungin tangka an thawh i bawmh hna.
CNF le CDF zong ralzaam in ram thumnak a phanmi Chin mipi nih tangka tampi an bawmh hna.
Ralzaam in ram thumnak rak phan hlah usih law CDF le CNF hi atu tlukin an ṭhawng lai lo. An herhhai (tangka) 90% cu ralzaam in ram thumnak phanmi sin in a ra.
Atu lio ram buai ruang i ralzaam dirhmun in ummi hna
Atu lio ram buai ruangah kan Lai hrithlai Chinmi 70,000 leng harsa taktakin ralzaam dirhmun in an um hna.
Mah rialte ralzaam hna hi ram thumnak an kal lo le ram thumnak kal kho dingin Chin kan pale hna nih an bawmh hna lo ahcun atu lio an umnak hmun ahhin kum zeizat dah an um rih lai i atu an tuarmi hi kum zeizat dah an tuar rih lai ti ahohmanh nih hngalh asi lo.
Ram thumnak kal dingin kan pale nih khua an khanpiak hna i an kal khawh ahcun anmah ca le an fale ca zongah let tampi in a ṭha deuh i hmailei ahcun atu lio ram thumnak ummi bantukin Chin ram herh caan ah bawm khotu an si ve te lai.
Thantlang khua lebang cu inn 500 hrawng an khangh cang caah ram hmanh dai sehlaw minung thong tampi cu umnak inn an ngei ti lo. Laitlang zapi zaran cu kum 5 chung hmanh ah inn 1 aa sak kho lomi kan tampi.
