15.3 C
Hakha
Thursday, September 23, 2021
- Advertisement -

Ṭial Tharmi

CNF Chairman Pu Zing Cung: Chin miphun cu ‘Federal Democracy Ram’ thar lei ah kal usih

Tuni, March 20 cu Chinmi hna nih mahte khuakhan lairelnak nawl kan ngah ṭhan khawhnak hnga, state vialte mahte cio in aa ukmi federal democracy ram kan ser khawhnak hnga le miphun le ramkhel tlukruannak a um khawhnak hnga caah ral kan thawhnak kum 33 a tlin ni si.

Dothlennak kan tuah chungah a nunnak a pemi CNF ralkap dihlak upatnak kaan pek hna.

Myanmar Ralkap nih hriamnam i bochan in rampi nawlngeihnak an lak caah ramkhel biaruahnak hmainor kho loin a taang. Rammi vialte nih fakpi in ralkap duhlonak an langhter.

33nk Chin Dothlen Ni camtuak. Victoria Sakhan – March 20, 2021

Ralkap nih kan zulh lai tiin min an thutmi ‘ramkhel buainak cu ramkhel biaruahnak in kan ṭhatter lai’ timi cu an buar. Democracy uknak ah kar hlan kan i thokmi zong a rawk. Rammi hna nih an nu paw chungin an i chuah pimi covo zong an sung.

Cucaah, ralkap nih hriamnam i bochan in rampi nawlngeihnak an lakmi hi Chin Miphun Ralkap (CNA/F) nih kan duhlo ti kan langhter. Uknak firtu ralkap cozah he ramkhel biaruahnak kan tuah lai lo.

Mipi nih ralkap duhlonak an langhtermi (CDM) hi 2008 Phunghram bangin thimnak ah teinak a hmumi party sinah uknak pe ṭhan uh ti si ti loin, 2008 Phunghram kan hrawh lai i ralkap uknak kan hrawh lai ti lei a panh cang.

33nk Chin Dothlen Ni camtuak. Victoria Sakhan – March 20, 2021

Thimnak aa cuhmi party pawl nih an i tinh bikmi zong 2008 Phunghram remh silole hrawh in a thar ser asi.

Rampumpi Kahngol Lungtlinnak (NCA) sachoh lei in ramthlen aa zuammi miphun hriamtlai phu pawl zong nih kan i tinhmi cu 2008 Phunghram remh asi.

Atu lio mipi cawlcanghnak nih aa tinh bikmi 2008 Phunghram hrawh hi rammi vialte nih kan duhmi asi.

CNF Chairman Pu Zing Cung le President U Htin Kyaw – 2017 ramkhel biaruahnak tuah lio

Cucaah, Chin Miphun Ralkap (CNF/A) nih hi mipi cawlcanghnak (CDM) hi kan lungtling khitkhat i a herhmi zong kan bawmh cuahmah hna.

Chin miphun ningpi in federal democracy ram thar lei ah kal usih.

Atang ah Kawlca in tling tein rel khawh asi

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -