CNA ralbawi Major Ngun Vung nih nizaan January 13 ah Tonzang peng ralram ah ral a tuk cuahmah lio ah a kan liamtak.
Nizaan tihni January 12 zongah CNA ralkap senthum Sergeant Van Sui Lian nih a kan liamtak. A pehpeh in CNA ralkap nih an kan liamtak cu ngaihchia tuk hringhran.
Tonzang peng, Senam khua ah ralhrang Myanmar ralkap he aa bawmmi Meitei tapung he an i kah lio ah a nunnak liam hi asi.
Major Ngun Vung cu Khampat khuami asi. An khuami Chelsea Bawi nih atanglei bangin a sian lonak le ngaihchiatnak a langhter.
Chelsea Bawi: CNA ralbawi Major Ngun Vung nih January 13 ahkhan ram le miphun caah martyr in a nunnak a kan pek piak! Tonzang peng Senam khua ah Meitei damiah pawl hi Kawl ralhrang he i tuai in an um tawn.
Meitei tapung pawl hi bing cin in ai cawm mi an si tawn. CNA nih thawldawi hrimhrim a herh cang caah an tuknak ah kan i bochan tukmi Major Ngun Vung nih ram le miphun caah mual a kan liamtak.
Major Ngun Vung hi hngakchiat lio tein keimah he zong ai kengkawi lengmang mi kan si i, nizaan tihni tiang zong ai chawn pengmi kan si ve tikah tubantuk thawngpang ka vun theih ahhin cun a fak ka tituk ve hringhran.
Khampat nih CNA ah ralbawi kan i ngeihchun mi paraltha pakhat te nih parbang in ruah lo tukin a kan liamtak mi hi Khampat ca zongah sunghnak faktuk asi i, a fak kan ti tuk hringhran.
Tantakmi chungkhar Bawipa nih in hnem hna sehlaw miphun caah Kawi Vung na saduhthahnak hi tlinter hram ko seh mu! Na hawikom, khuami le na miphun nih upatnak saangbik kan in pek!
Note: Thawngpang hi tial rih lo dingin an ti caah casnsaupi tial loin ka um, mi tampi nih an vun post cio caah ka vun post chim ve mi asi.crd by-Chelsea Bawi.
