Wednesday, December 1, 2021

CHRO nih NUG a cohlannak kong cathanh chuah

Chin Human Right Organization (CHRO) nih CRPH hruainak in dirhmi Rammi Lungrualnak Cozah (National Unity Government – NUG) cu kan cohlan tiah April 17 ah cathanh a chuah.

“NUG cu mipi lungtlinnak in a hungchuakmi a si. Khat lei in upadi ning loin a rak kaimi ralkap hi cozah ah a ruatmi zong an um ve.

“Hi pahnih kar ahhin NUG cu mipi caah rian a ttuan i minung covo, democracy le federal theipar a chuah ter khomi cozah a si lai tiin kan ruah caah kan cohlannak hi a si,” tiah CHRO leiin Salai Za Uk Ling nih a chim.

CHRO nih cathanh a chuahmi ah “NUG ah rianttuan dingin riankhinhmi pawl lawmhpinak le miphun kip, biaknak kip le ramkhel rianttuan dihlak nih mi a that cuahmah mi ralkap thlak khawh nak dingah NUG hi ttanh cio hna usih” ti zong aa tel.

Salai Za Uk Ling nih, “Sinain, NUG nih a ruah herh ngaimi cu a hlan cozah pawl nih cun miphun hme/tlawm namnenak kha ttha tein a tawlrel lo. A cung vuan lawngin a tlangtlak.

“Tha tein an zohfel lo ruangah atu bantuk in ralkap nih uknak an lak khawhnak zong hi a si. Cu caah, NUG cozah nih cun ttha tein hlathlainak tuah i a hlan lio palhnak vialte kha remh dih dingin atu hi caan tha a si tiin ka hmuh” tiah a chim. – Khonumthung

- Advertisement -