Yaw Kee, Esther Dawt Chin Sung le Benjamin Sum cu an 3 ning tein Myanmar Idol Top 5 ah an kai rih.
Tu zaan ah minta Kyaw Htet Aung nih Myanmar Idol vote result a thanh lio cu Chinmi 1 tal a tla sual hnga maw tiah thin a phang taktak.
Vote tlawmbik 3 ṭhutden ah Esther, Yaw Kee le Naw Say Say Htoo an ṭhut hnu hrim cun Esther lole Yaw Kee a tla sual hnga maw tiah thindomh in zoh cio asi.
Nain, anmah 3 lakah vote tlawm bikmi a hun thanh tikah Esther le Yaw Kee cu an kai ṭhan i Naw Say Say Htoo tu a tla ruangmang. Anih hi voi 1 a rak tla cang nain biakhiaktu pawl nih an khamh (save) mi asi.
Aw phundang ngai a ngeimi Benjamin Sum cu atutiang voi 1 taktak hmanh vote tlawmbik 3 (bottom 3) ṭhutden ah a ṭhu bal rih lo. Vote petu fans tam taktak a ngei tinak asi.
Top 5 ah a kaimi;
- Benjamin Sum
- Aye Mya Phyu
- Moo Ler
- Esther Dawt Chin Sung le
- Yaw Kee lakah Benjamin Sum lawnglawng hi vote tlawmbik 3 ṭhutden ah voi 1 hmanh a ṭhu bal rih lomi asi.
Adang 4 cu vote tlawmbik 3 ṭhutden ah a ṭhu balmi lawngte an si. Hiti ningin tuak ahcun Benjamin Sum hi Myanmar Idol Season 4 winner asi te ding alo.
Nain, adang pawl an tlak thluahmah tik ahcun a taangmi pawl caah fans an tam deuh lai i vote kal ning tampi aa dang kho. Winner ho dah asi te lai ti cu caan lawng nih a chim khawhte lai.
