Indianapolis, USA — Chinmi tam taktak (18,000 hrawng) kan um caah ‘Chindianapolis’ tiah capo biatak in kan auh tawnmi Indianapolis khuapi ah tuni hi US Vice President Mike Pence le a nupi an ra lai.
VP Mike Pence le a thaisung cu an khua Indianapolis ah ni 2 an caam lai — Vice President asi hlan ahcun Indianapolis ah khua a sa i Indiana state vuancichoh (governor) a rak si.
Tuni hi Indianapolis ah US – Mexico – Canada chawleh lungtlinnak (USMCA) kong biaruahnak an tuah lai i VP Mike Pence nih a hruai hna lai.
Chawleh lungtlinnak an ngeihmi nih Indiana state mipi le company caah zei dah hlawknak a chuahpi lai, tbk., pawl zong an ceih lai.
Vice President le Second Lady Karen Pence cu Air Force Two vanlawng in tu chun 11:15am ah Indianapolis an phan lai.
1pm ah MacAllister Machinery ah mipi sin biachimnak le cabuai cung biaruahnak a ngei lai. Kal ve a duhmi paoh nih mah hi hmet law America First Policies website ah manlo in ticket lak/register khawh asi.
A caan tlin hlan ah register tuah a herh.
Ningani ah, Community Hospital East um Neurodiagnostic Institute and Advanced Treatment Center ah a leng lai.
Mah hnu ah ngandamnak lei hruaitu hna he biaruahnak a ngei lai.
