Myanmar remdaih khuakhannak caah China cozah nih US$1 million (1.51 billion kyats) a pek. Tu zarh ah China cozah nih Asian palai caah a hmanmi Sun Guoxiang nih Kawlram a hung tlawn i a pek hna hi si.
China cozah nih Rammi Rualremnak le Daihnak Center (NRPC) caah $400,000 le Daihnak Kawmiṭi (PC) le Kaphnih Kahngol Zohfeltu Kawmiṭimi (JCMC) caah $300,000 veve (a dihlak $1 million) a pek hna.
Rampi Ruahnak Petu Zung Vuanci le NRPC vice chairman a simi U Kyaw Tint Swe nih Sun Guoxiang kut in bawmhnak tangka cu a cohlan, tiah Myanmar cozah nih cathanh a chuah.
China cozah media Xinhua News nih a ṭial ning ahcun, “ram 2 kan i hawikomh ning hoih in Myanmar remdaih rianṭuannak cu kan si khawh chungin kan bawmh peng,” tiin Sun Guoxiang nih a chim.
China cozah nih hitin a bawmh hi avoi 4nak asi cang, tiah theih asi.
“Myanmar mipi nih rianrang tein daihnak hmu hna seh ti zong kan duh,” tiah China palai nih a chim.
Bawmhnak tangka a pek hna lio ah, “hmailei ah Myanmar ram ah a phunphun in daihnak a len khawhnak hnga Myanmar cozah cu China cozah nih policy phundang te ser a bawmh lai,” tiah a chim fawn.
“Myanmar cozah nih nan herhmi paoh cu China cozah nih a ran khawh chungin bawmh kan in zuam peng hna lai.
“China cozah cu Myanmar ram caah bochan tlak ṭanpitu (ma-ha-meih) ram asi,” tiah Myanmar cozah rank sang pawl cu a chimh hna.
Myanmar a tlawn lio ah, China palai nih Ralkap Bawizik Min Aung Hlaing le Rampi Ruahnak Petu Daw Aung San Suu Kyi zong a ton hna.
January 2017 ah, China cozah nih Ramdang Vuanci Zung in Myanmar remdaihnak caah $1 million a rak hlut cang. 2020 tiangah $3 million kan bawmh hna lai, tiah China cozah nih bia aa tiammi chungin a rak hlutmi asi.
December 2017 ah, Guoxiang nih JMC caah $500,000 a rak hlut. June 2018 ah mah lio China Tanzung lutlai Pu Hong Liang nih JMC rianṭuan pawl fawizaang tein rian an tlunkal khawhnak caah tiin Volvo mawṭaw 10 a rak hlut. — The Irrawaddy English
