Chin state Paletwa pengah kan hnu zarh in AA le Kawl Ralkap i kahnak a zual caah khuami thong tampi nih nunnak kawl in an inn an zaamtak.
Chin state cozah biachimtu Sipin Vuanci U Soe Htet nih, “Ralkap nih AA tlaihmi Chin MP U Hawi Tin khamh rian an thok hnu in Paletwa peng khuate tampi in minung 6,000 hrawng nih an inn an zaamtak i dornak an kawl,” tiah a chim.
U Soe Htet nih, “MP an tlaih ruangah AA le ralkap ni 2 chung an i kap. Mah ruangah ralzaam an karh. MP cu atutiang kan chawn kho lo.
“Umnak ngeilo khuami pawl cu cozah nih bawmh kan zuam ko hna nain dornak inn a umlo caah a har tuk. Ralzaam tampi cu anmah tein khua kiangah buk an i sak. Cheukhat cu khua dang i an chungkhat sinah an i fon,” tiah a chim.
U Ngwe Than, Paletwa Peng Ralzaam le Kokek Hartong Bawmtu Bu lutlai chang nih, “Paletwa peng ralzaam pawl cu thla 3 ei ding kan hlut hna,” tiah a chim.
“Cozah nih facang le chiti a bawmh hna nain a za lo. Miza khua lawngah ralzaam 3,800 leng an um,” tiah a chim.
Salai Isaac Khen, Chin state Mei le Sipin Vuanci hlun nih, “ralzaam pawl cu bawmtu ngeilo vansangau in an um,” tiah a chim.
“Anmah tein ramtang ah mehhang kawl ti zongah a him ti lo. Bawmhnak hngah an hau,” tiah a chim.
November 3 ah Amyotha Hluttaw (Hlutdaw Sang) Chin MP U Hawi Tin le midang 9 cu Paletwa khua in Rakhine state Kyauktaw khua lei an kal lio Kaladan tiva cungah AA nih an tlaih hna.
An tlaihmi hna lakah 5 cu Kaladan pawngah kuli rian a tuanmi India rammi an si. 1 cu AA nih an hren lio ah lungtur in a thi. — Myanmar Times English
