Salai Khup Khup | Chin World — Chin state Khuasaktintuk Serṭhannak Rian caah Lakhruak Bawmhnak bu nih kokek hartong khuate cheukhat cu US dollar 8.996 million dih in lam le hlei a remhpiak hna, tiah kan theih.
Japan ram sifah zorternak tangka $10 million chungin $8.996 million cu Chin state Khuasaktintuk Serṭhannak Rian caah Lakhruak Bawmhnak bu nih khuate lam remhnak caah a hman.
Sipin Vuanci U Soe Htet nih, “Khuate herhhai caah an hman tiah kan theih. Kokek hartong an si ah lam cawhremhnak kong asi ah Chin state chung peng 1 ah khuate 3 paoh cu bawmh ding an ti. Bawmh ding khuate cu uktu bawi pawl nih an thim. Cun, hmasa bawmhnak ah aa rak tel lomi khuate 3 thim an si lai tiah kan theih,” tiah a chim.
2015 July thla ah Chin state khua tampi ah fak tukin vawlei a min i lam le innlo tampi an rawk. Mah vialte remh ṭhannak caah Khuate Uknak Zung nih Asian Development Bank (ADB) sinah bawmh a hal.
Cucaah Japan ram sifah zorternak tangka chungin $10 million an bawmh hna.
Chin state Khuasaktintuk Serṭhannak Rian caah Lakhruak Bawmhnak bu nih mah tangka chungin $8.996 million cu khuate lam, hlei, dinti le mei ser-remhnak caah a hman, tiah kan theih.
