Chin state ah 2nak college asi ding Arts and Sciences College cu Mindat khua ah an sak lio asi. Hmai kum October ah an lim ahcun December thla ah on dingin an i ruahchan, tiah Zatlang Zohkhenhnak Vuanci Pu Pau Lun Min Thang sin in kan theih.
Chin state ah 1nak college a simi Hakha College cu 2016 December ah an on. Mindat ah an sak liomi Arts and Sciences College hi pahnihnak asi lai.
“Atu hi sak an thok cang. Tangka 3 billion kyats chiahpiak an si. Hmai kum October thla ah sa dih hna seh tiin mah zat tangka kan pekmi hna asi.
“Mah tikah an lim ahcun December ahcun college an kai kho cang lai tiin keimah nih cun ka ruah,” tiah Vuanci Pau Lun Min Thang nih a chim.
Mindat college sak a tlainak aruang cu vawilei kong a rak tlamtlin lo ruangah si i tu kum ah cozah nih saknak tangka budget a pek hna i vawlei zong a tlamtlin cang caah sak an thok hi si.
Vuanci nih, “college sak an lim in siangngakchia auh in kaiter khawh an si lai. Rampumpi cozah nih Mindat le Kanpetlet peng an kai khawh ahcun duhsah in a herhmi zoh in inn thar zong kan in sakpiak chihte hna lai an ti caah December thla ahcun sianginn kan on khawh lai tiin ka ruah,” tiah a chim.
Charhchan: Chin World
