Chin Refugee Caah Fak Deuh In Chimrelnak Tuah Asi Lai

Chin Refugee Caah Fak Deuh In Chimrelnak Tuah Asi Lai

USASeptember 8, 2018: Malaysia le India ram hna ah a tang rihmi 50,000 renglo Chin ralzaam caah fak deuh in chimrelpiaknak (advocacy) rian ttuan dingin USA a ummi Chin Khrifahbu le community hruaitu hna nih Indianapolis khualipi ah meeting an tuah.

USA, Canada, Europe le New Zealand ram hna ah Chin ralzaam tam deuh an kal khawhnak dingah chimrel piaktu ‘Chin Refugee Advocacy body’ an ser tthan i, hruaitu upa zong thim an si.

Meeting ah USA khuasami Chin Khrihfabu le Communities (Zomi, Laimi, Mara, Mizo, Matu, Lautu, tbk.) zong an i tel kho, tiah kan theih.

“Hi bantukin USA a phanmi Chin unau tling te le lungrual tein kan miphun kong khua kan khan tti mi ka hmuh tikah ka lung aa lawm ngaingai. USA Chin tuanbia ah kan voi khatnak zong a si men lai,” tiah Salai Elaisa Vahnie, Advocacy Campaign Director i thimmi nih a chim.

Chin Refugee Caah Fak Deuh In Chimrelnak Tuah Asi Lai

Meeting ah a tlangpi in hnatlakmi hna cu:

(1) Malaysia ah ICC hruainak in August 13 in 15 tiang Chin Ralzaam Kong Khuakhannak meeting an tuah i ‘UNHCR nih Chin ralzaam donghter ding a timi kan cohlang lo’ tiin cathluan an chuahmi kha, meeting a kaimi vialte an lungtling.

(2) Malaysia le India um Chin ralzaam hna hi ralzaam taktak an si i UNHCR le ramdang zohkhenhnak an herh, meeting a kaimi vialte an lungtling.

(3) Atu lio Chin ralzaam hna an hmailei kong ruah tikah ram thumnak kal hi an caah a ttha bik ko, tiah meeting a kaimi vialte an lungtling.

(4) Ram thumnak an kal khawhnak hnga fakpi in chimrelpiak hna dingin meeting a kaimi vialte an lungtling.

Canada, Europe ram hna, New Zealand le US ram New York, Washington DC hna ah Chin ralzaam kong chimrel an thok colh lai.

Leave a Reply

Your email address will not be published. Required fields are marked *