Chin refugee an i telnak Malaysia movie nih Shanghai ah ‘movie ṭhabik laksawng’ a ngah

- Advertisement -

Barbarian Invasion‘ timi Malaysia um Chin refugee 2 an i telnak movie nih China ram Shanghai ah movie ṭhabik laksawng Jury Grand Prix a ngah.

Barbarian Invasion movie cu Malaysia Tuluk nu Tan Chui Mui nih a thlakmi si i Malaysia um Chin refugee 2; ACR Chairman James Bawi Thang Bik le Doris Par Thianhlun zong lemcang an ṭuan ve.

Nizaan tihni ah Shanghai International Film Festival ah Barbarian Invasion nih Jury Grand Prix laksawng a ngah.

Shanghai International Film Festival ahcun kum fatin vawleicung ram 100 leng nih an chuahmi movie 2,000 leng chungah a ṭhabikmi an thim hna.

Barbarian Invasion nih Jury Grand Prix laksawng a ngah tiin Shanghai International Film Festival (SIFF 2021) puai ah an thanh lio

Tu kum laksawng sangbik 2 cu China chuahmi le Malaysia chuahmi nih an ngah. China chuahmi Manchurian Tiger nih Best Feature Film laksawng (ṭhabik) a ngah i Malaysia chuahmi Barbarian Invasion nih Jury Grand Prix (ṭhabik 2nk) a ngah.

James Bawi Thang Bik nih, “Keimah le ka hawi Doris lemcang kan ṭuan venak movie nih Shanghai ah Jury Grand Prix laksawng a ngah,” tiah aa lawmhnak kong a chim.

“Mah tluk tiang ding hi cu ka ruah bak lomi asi! Shanghai International Film Festival Golden Goblet Awards ah Jury Grand Prix laksawng a ngahmi movie ah kai tel ve cu kaa lawm tuk.

“Malaysia zongah piah colh hna seh ti ka duh. Movie ah aa telmi vialte kan lawmhpi hna,” ati.

Movie ahcun James Bawi Thang Bik le Doris Par Thianhlun cu ralzaam in lemcang an ṭuan. Myanmar in Malaysia lei ah ramtang in an zaam lio ah misual nih dawimi nu an hmuh i an khamh.

Movie laksawng sunglawi tuk asi caah Malaysia media pawl zong nih “Malaysia movie nih Shanghai ah Jury Grand Prix laksawng a ngah” tiah linsa taktak in an thanh cio.

Malaysia cu COVID-19 a karh tuk ruangah cinema zoh a ngah rih lo. A ngah cangka in an piah ve te lai tiah zumh asi.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...