Mizoram cozah nih Mizoram pumpi khuakip ah Myanmar ralzaam ngakchia 400 hrawng sianginn a kaiter hna. Chin ngakchia deuh lawngte an si.
Mizoram palik CID cazin ning ah, Kawl Ralkap nih February 1 ah uknak a fir thokin Mizoram district 11 pumpaluk ahhin Myanmar ralzaam 11,000 leng an lut cang. Chin State Cozah Lutlai hlun Salai Lian Luai telh in MP 20 hrawng an i tel. Ralzaam cu Chinmi deuh lawngte an si hna. Tambik cu ramri um Champhai, Siaha, Lawngtlai, Serchhip, Hnahthial le Saitual district khuate pawl ah an lut hna.
Mizoram state pumpi ah Myanmar ralzaam ngakchia 400 hrawng sianginn kan kaiter hna, tiah vuanci pakhat nih a chim.
Laitlang pawngte ah a ummi Hnahthial district um Thingsai khuate zongah Chin ralzaam ngakchia tampi sianginn an kaiter hna. Mizo holh le Mirang holh in “Kan i lawm Mizoram” ti aa ṭialmi catar te an i put lio hmanthlak zong thawngla pawl nih an tar len.
Mizoram state Fimcawnnak Vuanci Lalcchandama Ralte nih, “Myanmar ralzaam ngakchia vialte cu an umnak khua sianginn cio ah an kai khawhnak hnga a herhmi paoh tuahpiak hna uh tiin August thla dongh ahkhan Fimcawnnak Zung nawl ka pek cang,” tiah PTI sinah a chim.
Kum 2009 ah an sermi Ngakchia Paoh cu Man Loin Fimcawnnak Nawl Pek Hna Ding timi upadi hmangin an kaiter hna hi si. A sifakmi le hartongmi kum 6 in 14 kar ngakchia paoh cu a kumkhua he aa tlakmi catang ah kainak nawl a ngei, ti asi.
Fimcawnnak Vuanci Pu Ralte nih, “Kan minung hawi zawnruahnak lungput in kan kaitermi hna asi. Mizoram pumpi ah Myanmar ralzaam ngakchia 400 hrawng hi cozah sianginn le private sianginn ah kan kaiter hna. Fimcawnnak Upadi nih cun ngakchia cungah thleidannak a ngeih lo caah cozah nih kan minung hawi zawnruahnak in kan kaitermi hna asi,” ati.
“Ralzaam ngakchia hna cu sianginn khan chungah holh thiam lo ruangah harnak an ton ahcun a herh ningin cozah nih khan kan tuaktan piak hna lai,” ati.
Ralzaam pawl cu dawtnak a ngeimi Mizo pumpak le bu pawl nih an bawmh hna pinah, anmah tein an i phurhmi zongin an nung/khuasa.
NUG cozah nih September 7 ah rampumpi ah ralkap cozah doh dingin thawng a thanh hnu in, Mizoram ah Chin ralzaam tampi an phan chap.
Tu kum March thla ahkhan, Mizoram State Cozah Hruaitu Pu Zoramthanga nih, “Myanmar ralzaam pawl luhter hna hlah uh, a lutmi paoh khirh dih hna uh tiin Rampumpi Cozah nih ramri um state 4 nawl na kan pekmi hi kan zohfel piak ṭhan (luhnak nawl le dornak nawl pe hna),” tiah a nawl.
“Mizoram state mipi cu ramri um Chinmi he aa chungkhatmi kan si. Atu bantukin kan unau hna nih harnak an ton tikah bawmh hna loin kan um kho lo,” a rak ti.
Mizo National Front lutlai zong nih March 18 ahkhan, “Myanmar ramkhel buainak ruangah a hung zaammi hna hi nangmah pumpak hrim nih India ram ah dornak nawl pe hna,” tiin India Rampumpi Cozah Hruaitu Prime Minister Narendra Modi cu ca a rak kuat ve.
