Chin ralzaam donghternak policy ngol chung dingin UNHCR an nawl

Chin ralzaam donghternak policy ngol chung dingin UNHCR an nawl

Malaysia: UNHCR nih Chin ralzaam hna an ralzaam sinak donghter dingin phungphai na tuahmi hi ngol chung rih, tiah ralzaam covo bu APRRN nih a nawl.

“Naite ah UNHCR nih, Chin ralzaam donghternak phungphai tuah dingin bia a khiahmi ruangah Malaysia um Chin ralzaam 30,140 le India um 3,000 harnak a tong ding an si caah kan lungrawk tuk,” tiah Asia Pacific Ralzaam Covo Bu (APRRN) nih cathluan a chuah.

“Mah phungphai kha UNHCR nih na pehzulh ahcun Chin ralzaam tampi cu ningcang loin an ralzaam sinak chuh an tong lai i an him lonak ram ah kir an hau lai.”

“NLD-hruaimi cozah nih ram chungah daihnak a lenter pah ko nain, tlangcung miphun hna peng le khua ahcun thlennak zei pipa a um rih lo.”

“Myanmar ram hmun cheukhat ahcun tthatlei a panh ko nain, ram pumpi, ahlei in tlangcung miphun hna khuaram sining zoh tikah ralzaam donghternak caah a herhmi thlennak taktak a um rih lo.”

“UNHCR nih Chin ralzaam pawl card na chuhmi hna hi ngol chung rih, Chin le adang ralzaam hna hi kir an duh lo buin hnek hna hlah; Chin ralzaam hna him tein le limhang ngei tein an kir khawhnak dingah Myanmar cozah he zong tonbiaruahnak ngei hmasa,” tiah APRRN nih a ttial.

UNHCR nih, “Chin state cu a dai in a him cang caah Chin ralzaam pawl cu zohkhenh nan hau ti lo,” tiin thawng a rak thanh.

Malaysia um ralzaam vialte lakah a tambik changtu a simi Chin ralzaam hna cu, “August thla in nan caah ralzaam sinak donghter hram kan thok cang lai,” tiah UNHCR nih June 13 ah a rak chimh hna.

August thla thokin, UNHCR zung a panh Chin ralzaam paoh cu interview phitter loin 2019 December 31 tiang a nungmi card a pek hna.

January 1, 2020 thok cun, Chin ralzaam card cu a thi dih lai i sauhpiak an si ti lai lo. UNHCR nih a zohkhenh ti hna lai lo. — The Star

Leave a Reply

Your email address will not be published. Required fields are marked *