Chin ralkap (CNA le hawi) cu January 12 in 22 tiang Hingzing khua ah ralhrang he ni 10 chung an i kap.
“Ralhrang Myanmar ralkap 80 kan thah hna. Kanmah lei ralkap 3 an nunnak liam ve i 9 hliam an tong ve,” tiah PDF-Zoland nih a chim.
Hingzing khua cu Sagaing ramṭhen le Chin ramṭhen i Tedim, Falam le Hakha lei kalnak lam ah a ummi si pinah Myanmar-India ramri chawlehnak lam zong asi. Kalaymyo in meng 20 hrawng lawng aa hlatmi tlangcung khua asi.
Hingzing ral ahhin Chin ralkap phu 7;
- CNA
- PDF-Zoland
- CDM-Siyin
- CNDF
- PDF-Zomi
- Zogam Army le
- CDF-KKG an i bawm. Mah pinah PDF-Kalay zong nih a bawmh chih hna.
Ralhrang Myanmar ralkap le mipi ralkap i kahdohnak ral vialte lakah Hingzing hi mipi ralkap phu tambik an i bawmhnak ral asi.
January 12 ah ralhrang Myanmar ralkap 100 hrawng Chin ramṭhen lei ah an kai caah Hingzing ral hi aa thokmi asi.
Chinram lei a hung kaimi ralhrang pawl cu an riahnak Htayzan khua pawngah January 13 ah Chin ralkap nih an kah hna i 7 an thah hna. Chin ralkap lei cu hliam tongmi an um lo. Mah zaanlei 2pm hrawngah Htayzan khua pawng coffee dum ah ralhrang nih inn 3 an duah khangh hrawh.
Ralhrang pawl Chinram an rak kai lio December 25 ah ralhrang nih an tlaihmi CDM-Siyin ralkap pakhat cu tutan ahhin lam hruaitu ah an i ratpi nain a zaam kho. Mah ni ah CNA, CDM-Siyin, PDF-Zoland, Zogam Army, PDA le CNDF nih ralhrang cu an kah hna.
January 14 zingka 10am in zaanlei 3pm tiang an i kap peng. Ralkap 1 an thah pinah ceilak an hliam hna.
January 15 ah ralhrang pawl tamtuk an thih caah Kalay University in ralhrang nih miakpi in Chin ralkap umnak lei voi tampi an kah. Raltuknak vanlawng 2 zongin voi tampi bomb in an kah hna caah Chin ralkap 7 fak piin hliam an tong. CNA ralkap senthum Thang Pui zong fak tukin hliam a tong.
A thaizing January 16 ah CNA ralkap senthum Thang Pui cu a hliamhma in a nunnak liam.
January 17 zingka 10am ah Chinram le Kalay ramri lam ah a hung kaimi ralhrang bawmtu ralkap motor nganpi 3 le sehmeithal bunhmi motor 2 cu Chin ralkap nih an bawh kah i ralhrang 10 an thah hna pinah ceilak an hliam hna, cucaah ralhrang pawl cu an mei i thuh in Kalamyo lei ah lodiam an kir zaam ṭhan.
January 18 zingka 8am ah Kalay University le Kalaymyo, Taungphila in ralhrang nih miakpi in Laitlang lei voi tampi an kah. Hingzing khua um ralhrang le Chin ralkap zong an i kap, nain ralhrang nih Hingzing khua an chuahtak hlei lo.
January 19 zaanlei 1:30pm ah ralhrang nih Tedim peng, Kenedy Tlang par ralkap sakhan ah helicopter in ralkap tlawmpal le thilri a thlak chanh hna. Chin ralkap he tlawmpal an i kah hnu zaanlei mui lai ah Hingzing um ralhrang 2 an thah hna.
Falam khua lei in Tedim lei ah a kalmi ralhrang 180 leng cu CNDF nih fak ngai in an kham kah hna caah hmai nor kho loin Lungbang khua ah an riak.
January 21 dei hlan 1:45am ah Chin ralkap nih Hingzing um ralhrang pawl cu an dum kah hna i 15 an thah hna pinah tam taktak an hliam hna. Chin ralkap 2 hliam an tong ve nain an nunnak caah thinphang asi lo.
Ralhrang bawm dingin Tedim lei in ralhrang 100 hrawng an ra i Chin ralkap nih an kah kham ve hna.
January 22 ah Kalay University um ralhrang nih miakpi in Tedim peng, Taingen le Hingzing khua kar voi tampi an kah. Zingka 8:30am aah helicopter 2 in ralhrang an hung phan chap i sehmeithal in an kah chih hna pinah bomb tamtuk in an kah chih hna.
Tedim lei in a rami bawmtu ralhrang pawl zong cu lam loin ramtang in an ra. Ralhrang nih lam hla kahnak meithal 60mm, 120mm, 155mm le helicopter tiangin an kah hna. Hriamnam le minung thazaang aa thlau tuk caah zaanlei 5pm ah Chin ralkap pawl cu Taingen in chikhat an chuak chung.
Mah ni chunnitlak an i kah ahcun ralhrang 40 hrawng an thih pinah ceilak hliam an tong. Chin ralkap tlawmpal hliam an ton ve pinah PDF-Zoland ralkap Kap Suan Mung le CNA ralkap Salai Cung Lian Sang an nunnak liam ve.
Kalay le Chinram khuapi pawl pehtlaihnak lam ah a ummi Hingzing khua ah ni 10 chung an i kah hnu January 28 ah PDF-Zomi, People Defense Army, Civic Defense Militia le Zogam Army cu tangti ralkap phu in an dir lawlaw i ral tuk zong cawngti dingin timhtuahnak an ngei.
Myanmar ralkap nih mipi thimmi cozah uknak a chuh hnu ah Chin ralkap he voi tam tuk ngandam an i kap cang. 2021 December tiang ahkhan ralhrang 1,029 kan thah cang hna i kanmah lei cu 98 lawng kan thi, tiah Chin Ralkap Phu Kawmh (CJDC) nih a thanh.
Ref: Chin World
