Chin Puaisa Pari Ruangah Chinmi 10 China Ram Ah Thong An Tla

Chin Puaisa Pari Nih Chinmi 10 China Ram Ah Thong A Thlak Hna

Chin puaisa Rosilin Pari @Cuaitin Pari nih Kawlrammi 13 thong a tlakter hna. An dihlak in pa lawngte an si. Minung 10 cu Chin miphun lawngte an si i adang 3 cu Kawl miphun an si.

Chin miphun hna cu Tedim, Falam le Mizo pawl an si i tam deuh cu Tahan pengah a ummi an si hna. Kawl 3 lakah 2 cu Pu Chit le Zaw Zaw an si. Adang pakhat cu a min an hngal rih lo.

“August 6 ahkhan ka naupa Lalhriat Zuala @Aye Min Maung le adang Kawlrammi 12 cu China ram Guangdong ah palek nih an tlaih hna i atutiang thonginn chungah an um peng ko,” tiah Lal Pian Huna nih The Chin Express ah a chim.

Chin Puaisa Rosilin Pari Nih Ka Naupa le A Hawile A Hlen Hna
Pari he aa bawmmi Tuluk boss pa nih Myanmar ramri tiang kan thlah hna lai a ti hna nain Guangdong lamkam ah a thlak hna i a zaamtak hna

“Thong an tlak hnu in atutiang zeihmanh an thawngpang kan thei kho ti hna lo. Myanmar Tanzung lei zongin atutiang an thawngpang kan thei kho rih lo. Kan khua Kawlkulh ah ka nulepa zong lungrethei tukin an um.”

“Thong an tlakmi hi an puaisa Rosilin Pari ruangah a si. Rosilin Pari hi Tuluk boss pa he an i bawm. Tuluk pa nih cun Myanmar ramri tiang kan thlah hna lai i Myanmar nan phak tikah Rosilin Pari a nulepa hnahnawhnak nan pe hna lai lo a ti hna.”

“Myanmar ramri tiang thlah loin China ram, Guangdong lamkam ah a va hlonh hna caah palek tlaih le thongtlak an ton hi si,” tiah Lal Pian Huna nih a chim.

Rosilin Pari nih a hlen hna caah China ram an kalnak si

“Rosilin Pari nih China ram nan phak tikah phone dawr ah nan ttuan lai a ti hna. Ka nu nih Rosilin Pari a nulepa sinah voi tampi a va hlat i ‘kan fanu cu zumh lo awk um lo’ an ti ruangah ka naupa a kalter hi si. Rosilin Pari i Varpui khuami a si.”

“Nain, Rosilin Pari nih amah he aa bawmmi Tuluk pa company (plastic sehzung) ah a ttuanter hna. Ni 20 chung din loin an ttuanter hna hnu ah palek an ra an ti i an zaamter hna.”

Chin Puaisa Rosilin Pari Nih Ka Naupa le A Hawile A Hlen Hna3
Lamkam ah sau nawn an um hnu ah palek nih an tlaih hna i atutiang an thawng theih a si ti lo, Pari sinah bawmh an hal nain a bawm duh hna lo

Rosilin Pari nih an thlahlawh a pe duh hna lo

“Ni 20 an ttuanman fang 1 hmanh a pe hna lo. Thla 1 chung rianttuan loin an umter hna i rawl a rim nammi peng an pek hna. Rawl kan in pekmi hna he aa ci an ti hna.”

“Kan tlung lai an ti nain an tlunter duh hna lo, Rosilin boss pa company tthiam a simi cuaipia sehzung ah an ttuanter tthan hna. Thla 3 chung ni 1 hmanh din loin suimilaam 10 le a caan ah 12 chung peng an ttuanter hna.”

“Suimilaam 1 ah yuan fang 8 in an ttuanter hna. Thla 1 ah yuan 2,400 a hmu ding an si i thla 3 ahcun 7,200 leng cio a hmu ding an si nain 250 cio lawng a pek hna. Tuluk pa an hal tikah nan lahkhah kan pek dih cang ko hna cuta a ti. Rosilin Pari an hal tikah mah zat lawng aa ka pek a ti ve hna.”

“Mah ruangah an thinhung tuk i, kan lahkhah kan liamh seh, palek sinah kan report lai an ti. Cucaah, Tuluk pa nih tlun nan duh ahcun Myanmar ramri tiang kan thlah hna lai i Rosilin Pari a nulepa harnak nan pe hna lai lo a ti hna, nain ramri tiang thlah loin Guangdong tiang lawng a thlah hna i lamkam ah palek tlaih dingin a chiah ta hna hi si,” tiah Lal Pian Huna nih a chim.

Chin Puaisa 'Rosilin Pari' Nih Ka Naupa le A Hawile A Hlen Hna
Rosilin Pari @Cuaitin Pari (Pari @Cuaite)

Rosilin Pari cu The Chin Express nih kan chawnh

“Puaisa ka si lo. Ka boss pa hi China ram ah company tampi a ngeimi si i hmun kip ah holhlet ka ttuanpiak,” tiah Rosilin Pari nih a chim.

“Ka boss pa tu hi puaisa tampi he aa pehtlaimi si. Kawlram ah minung a cah tawn hna i ramri tiang a don tawn hna, keimah nih holh ka lehpiak tawn hna.”

“Nain, February ah kan khua Varpui ah ka tlung i kan khua pawng minung pawl nih China kal kan duh ve, ra kan bawm ve an ti caah minung 53 ka bawmh hna. Tangka zong keimah sinah an ka pe lo, ramri ah ka boss pa sinah an pek,” a ti.

“August 6 ah tlaih a tongmi kha ka bawmhmi hna lakah aa tel vemi an si. Ka bia ngaih duh loin anmah tein an kal i mah thil kha an tonmi si. Zei ruangdah ka bia an ngaih lo ti cu ka hngal lo. Keimah theih loin an kalmi si caah zeihmanh ka hngal lo, atu khuazei an um zong ka hngal lo.”

“Tangka 250 ka pekmi hna kong he pehtlai in, suimilaam 900 chung an ttuanmi cu zuh ding an si. Suimilaam 600 cu boss nih a liampiak chungmi hna an mawttaw cit man, an lansazeih a si. Suimilaam 300 cu thla 1 an dihheumi man si. Zeihmanh ttuan loin 250 an ngahmi hmanh kha an vanttha leh. An duh paoh in bia an chim, bator hna,” a ti.

“Rosilin Pari nih a chimmi hi lih lawngte a si, mah tluk a hrokhrawl cangmi nih cun ka palh a ti bal lai lo hen cu,” tiah Lal Pian Huna nih a chim. ”

“A kong kan hlat tikah, Singapore zongah hitin a mual a rak pho caah Macau ah a kal. Macau in mainland China ah a kal tthan i atu Tuluk boss pa he i bawm in puaisa a ttuan pengmi si. Ni kum zongah fak tukin a mualpho nain a nulepa nih mitthli he an rak nawl hna ruangah an ngaihthiam hna,” a ti.

“Atu zong Tahan palek sahkhan ah human trafficking case in ka pa nih a report cang. Ka pa lila zong cu palek a si.”

“Nain, Pari cu China ram ah a um caah zeihmanh an tuah kho lo. Ka palh bak lo ati ahcun Kawlram ah rak tlung seh ca, a palh le palh lo a theih lai cu. Atu hmanh ah a nulepa inn ah minung an phan lengmang cang hih,” tiah a chimchap.

“Palek sin ahcun an ka report rih lo, kaa theih rih lo,” tiah Pari nih a chim.

Rosilin Pari minung 30 company dangah an zaam

Pari a minung dang 30 zong company dangah an zaam. A zaami cu Tahan peng i Taungphila le khua dangdang ah a ummi Falam lawngte an si, tiah Pari sin in a zaam vemi Chin nu pakhat nih a chim.

Nain, “an zaam lo, an um ko,” tiah Pari nih The Chin Express ah a chim.

Leave a Reply

Your email address will not be published. Required fields are marked *