Singapore ram ah sinum rian a ṭuanmi kum 24 Chin ngaknu Piang Ngaih Don rawl loin a hremtu, a veltu le that beh tu a boss nu cu tuni June 22 ah Singapore cozah nih kum 30 thong a thlak.
“Pi Gaiyathiri Murugayan nih a sinum Myanmar nu a tuahto ning a chiat tuk ning hi bia nih a tlinh lo,” tiah High Court biaceihtu Pu See Kee Oon nih a chim.
“A sinum nu caan sau tuk remruam a hrem hnu ah a thah. Mi thah vialte lakah a chiakha bik asi,” ati.
Tazacuaitu cozah sihni pawl nih cun ‘nun chung thongthlak dingin biaceihzung an hal’ nain biaceihtu nih ‘a boss nu hi a thluak hman pah lo lio si caah’ tiin kum 30 lawng thong a thlak hi si.
Piang Ngaih Don cu a boss nu nih rawl loin a chiah lengmang i a velh lengmang caah a thih lio kum 2016 July 26 ahcun 24kg te lawng asi.
Piang Ngaih Don cu kum 2016 ah a thi cang nain a boss nu cu biaceihzung nih taza an cuai lengmang i tuni ceo ah kum 30 thongdan an pek khawh hi si.
Lainawng Pi Gaiyathiri cu fa 2 a ngei i kum 9 le 6 an si.
“Pi Gaiyathiri nih a sinum Piang Ngaih Don cu aa filh hnawmh tuk caak ka sikmi si a timi hi a lih lawngte si. A hremmi vialte hi filh hnawmh he zeihmah aa sai lo,” tiah tazacuaitu cozah sihni Mohamed Faizal Mohamed Abdul Kadir nih biaceihzung ah a chim.
“Minung lo bantukin a hmuh caah hi tluk fak in a hrem i a thah behmi hi si. A nun chung thong nan thlak lo hmanh ah a tlawmbik kum 27 tal cu thla uh,” ati.
Piang Ngaih Don cu kum 2015 May 28 in Pi Gaiyathiri sinah sinum rianṭuan aa thok. Ni fatin a a velh i a hrem peng.
Piang Ngaih Don cu a bengh, nam, thongh, chuih i ṭuang ah a lamh chih. A hmuhmi paoh in a tuk, a sam hnuh, a lin taktakmi darlin (thil ṭaihnak) in a khangh, a hrom dih.
Pi Gaiyathiri cu ni kum January 13 ah a vapa nih a ṭhen.
Rawl a ei ter caan zongah pawngmongh (bread) ti ah ciahmi, zikhetatṭa chung chiahmi rawl kik le zaan ah buh lawng ti bantuk a eiter.
Aa kholh caan zongah tikholhnak khaan kutka khar loin a kholhter.
A thih lai ni 12 chung cu, ṭuang ah a ihter i thlalangawng tlang ah hri in a hren.
Kum 2016 July 25 zaan zongah ‘thil suk na nuar/fum tuk’ tiin Pi Gaiyathiri le anu Prema nih an velh.
A thaizing zingka zongah Gaiyathiri nih a velh chap. A hrom dih chih. Suimilaam tlawmpal hnu ah Piang Ngaih Don cu a thi.
Gaiyathiri anu Prema zong cu biaceihzung ah taza an cuai ve nain bia an khiahpiak rih lo. Gaiyathiri a vapa (tu cu an i ṭhen cang) zong taza an cuai ve nain bia an khiahpiak rih lo.
