Chin state — Paletwa peng khuate cheukhat ah a tlaumi Chinmi 15 cu nihin tiang an thawng theih asi ti lo. Hi bantuk zeihmanh an kong theih loin an tlaumi hi Rampi cozah le State cozah rian asi, tiah CHRO in Pu Terah nih a chim.
Pu Terah nih, “atutiang hmuh khawh lomi 15 an si cang. 2018 ah 2 an tlau, 2019 ah 13 an tlau. An tlaunak hmun ah Kawl ralkap le AA an um. Anmah zong hi mitlau kongah tuanvo an ngei.
“A tlaumi an tamtuk. An tlaih hna cun an tlaihnak hna aruang zong an chim ding si. Anmah he aa pehtlaimi cu an chim awk si. Zei thawng hmanh theih loin tlau cu mipi himnak caah thinphang tuk asi,” tiah a chim.
Paletwa peng Bawngwa khuami 4 zong July 16 ah an tlau i nihin tiang an thawng theih asi ti lo, tiah khuami nih an chim.
A tlaumi Bawngwa khuami 4 cu;
- U Kyaw Kyaw Than, kum 25
- U Kyaw Sein, kum 31
- U Kyaw Lin, kum 23 le
- U Soe Ye Aung, kum 32 hna an si.
Khuami U Samuel nih, “anmah 4 an tlau thaizing 3am hrawngah khuami dihlak nih kan kawl hna nain kan hmu hna lo, nihin tiang an thawngpang zeihmanh kan theih lo caah an nupile, hawikom le chungkhat pawl an lungrethei tuk,” tiah a chim.
A tlaumi 4 nih an i citmi motorcycle 2 cu an tlau a thaizing zingka tuante ah khuami nih an hmuh. Motorcycle an hmuhnak pawngah AA ralkap an rak um, tiah mitlau kawlnak ah aa tel vemi minung pakhat nih a chim.
Charhchan: Chin World
