Chelsea FC ngeitu Russia pa cu UK ram um an phih

Vawlei pumpi nih zoh lengmangmi UK ramchung bawlung chuih zuamnak Premier League ah minthang bik club a si vemi Chelsea FC ngeitu Russia mirum pa Pu Roman Abramovich cu Russia President Vladimir Putin bawmtu asi tiin UK cozah nih UK ram ah um kho lo dingin a phih, tiah UK tadinca Daily Mail le The Sun nih an thanh.

Chelsea FC ngeitu pa (alai) le Russia President Putin meeting an tuah lio

Russia nih Ukraine ram chuh dingin a tuk caah UK cozah nih fak chiahru in Russia ram le hruaitu President Putin sipuaizi phih chap a timh. Putin a bawmtu Russia mirum tumtlang vialte zong UK ram ah sipuaizi tuah phih dih a timh hna.

Hlan lio cun Chelsea FC hi zei pipa a rak si lo nain 2003 ah Russia mirum pa (hmanthlak) nih a cawk hnu in UK ram bawlung chuih thiambik club ah aa tel ve cang. Liamcia thla tlawmpal zongah Club World Cup an lak — UK nih hipa fak chiahru in sipuaizi a phih taktak ahcun Chelsea FC tlak lei a panhte hnga dek maw…

Chelsea FC ngeitu Russia mirum pa hi Israel citizen zong a ngei chihmi si. Israel citizen pawl cu visa sok hau loin UK ram ah tlawng le thla 6 chung um khawh asi. Nai hrawng cu Russia passport hmang loin Israel passport in UK a lut puh tawn.

UK ram ah sipuaizi tuahnak visa zong a rak ngeimi si nain 2018 thokin tatṭan a ṭu ti lo. A chawva dihlak hi £8.4 billion hrawng a ngeimi si. Mah chungah billion tlawmpal hi UK ram ah a um.

UK ram ah million tampi man inn ṭhaṭha le mirum tilawng pawl zong a ngei.

UK khualipi London i mirum sang Kensington Palace Gardens ah a ummi ihnakkhan 15 um mansion asi. Chelsea FC ngeitu Russia mirum pa inn asi i £125 million man asi.

Zei tik hmanh ah UK ram ah umnak visa pek lo dingin an kham hi si. Atutiang thawngpang a len ning ahcun ‘UK tlawn cu ngah dawh asi ko, nain ‘um thai (PR)’ ngah lo dingin an phih.

Amah lawng si loin UK ram ah sipuaizi a tuahmi Russia mirum pawl zong an phih dih hna lai. Russia President Putin nih Russia mirum pawl Russia sipuaizi caah le ramdang ah a rem lomi pawl thatu dingah Russia sungṭhoh a kuatmi hna bawmtu dingah a hman hna, ti asi.

President Putin nih UK ram ah ummi amah dotu Russia rammi 2 cu sivai (poison) in a thah cang hna.

Chelsea FC ngeitu Russia mirum pa tilawng asi i ‘Solaris’ tiin min an bunh. £450 million man asi. Mah tilawng ahhin missile a rat theihnak seh tiang a um.

Russia mirum tumtlang taktak a si vemi Pu Alisher Usmanov zong nih UK ram i Arsenal FC ah tangka tam taktak a invest ve. Arsenal FC share 14:58% bak a cawk.

UK cozah nih, “Russia ram le President Putin cu a fah khawh chung fakin sipuaizi kan phih lai. UK ram ah sipuaizi a tuahmi Russia mirum pawl hi Putin bawmtu lawngte an si caah sipuaizi tuah kan phih viar hna lai. Russia bank vialte zong kan phih dih hna lai. Russia nih Ukraine ram ah a thlahmi a ralkap pawl a kirter hna lo ahcun a fak bikmi sipuaizi phihkhamnak a tuar lai,” ati.