Ralkap uknak duh lo ruangah CDM a lutmi ralkap le palek tampi lakah ralbawi pakhat zong a hung i tel ve.
Magway Region, Minhla khua ah a chuakmi ralbawi Hein Taw Oo cu a rianttuannak Shan state chaklei, Lashio in a chuak i March 24 inkhan ralkap uknak doh aa thok.
CDM a lut ciami ralkap vialte lakah atu pa hi rank sangbik a si.
Ralkap nih uknak a lakmi ah a lungtling lomi ralkap bawi tampi ran rak um ve tiah ralbawi Hein Taw Oo nih a chim.
Ralbawi Hein Taw Oo nih, “Ralkap bawi cheukhat zong CDM ah luh an duh tuk ve ko” tiah a chim.
Dai tein sandahpiahmi mipi pawl tukvelh le thah an tonmi kongah ralbawi Hein Taw Oo nih, “Naypyitaw ah a ummi ralkap zung nih raltuk nak lei ah ttuanvo pekmi ralkap bawi pawl a fialmi hna a si.
“Sandahpiahnak hmun hrawk dingin nawl a petu ralkap bawi pawl nih sandahpiah mi mipi an umnak hmun pawl cu ral tuknak hmun bantuk ah ruat ding in le kah hna dingin an tanglei ralkap pawl cu an fialmi hna.
“Cun, ralkap pawl nih mipi thilri an lak/firmi pawl zong hi cunglei ralkap bawi pawl nih an i theihter lo.
“Ralkap pawl cu zei ruangah dah mipi thil nan lak tiin cawnpiak loin nan caantha a si, ral nan tuk/dohnak in nan hmuhmi a si titu in an ti hna,” tiah a chimchap.
Ralbawi Hein Taw Oo cu a biaknak Buddhist phungin atu hi phungki a luh lio a si.
Ralkap nih February 1, 2021 ah uknak a lak hnu in ralkap doh ruangah a nunnak liammi rammi 738 an si cang. – Myanmar Now
