CDF-Zophei nih tangka ting thong 1 leng in Zophei khua 22 ah sianginn a on

- Advertisement -

CDF-Zophei nih tangka ting thong 1 leng dih in Zophei tlang khua 22 ah sianginn a on cang. Sianginn ah Myanmar thantar thlaimi cu CNF thantar in a thlen viar.

CDF-Zophei Fimcawnnak Secretary (ramchung ummi si caah min langhter awk ṭha lo) nih, “Zophei tlang khuakip um kan fale le kan naule hna hi COVID pulrai le ral ruangah kum 2 chung sianginn kai loin an um cang caah ca lei lawng si loin an ziaza zong rawk sual lai tiin nulepa an lungṭha lo,” tiah a chim.

“Hiti ningin sianginn kai loin kum 3 le kum tampi an um thai ahcun an nun rawk sual lai ti an phan caah CDF le Zophei nulepa hna khuakhannak in February 1 in sianginn kan on cang hna.

“Khua 3 hrawng cu COVID ruangah lockdown an si i Nikhatni (February 14) lawngin sianginn kai an thok kho.

“CDF budget chungin Zophei khuakip ah CDM a tuahmi saya/ma 140 leng kan hlanpiak hna. Saya/ma cu an retheih man thla 1 ah ks 130,000 cio kan pek hna lai.

“Thla 6 chung sianginn kai kan i timh caah saya/ma lahkhah lawng ahhin ting thong 1 leng a dih lai. Mah pin ahhin a herhmi dang zong um len rih lai.

“Sianginn cu zarh 1 ah ni 4 (Nikhatni in Nilini tiang) kai asi. Ni 1 ah ching 6 um. Kai caan suimilaam cu an khuami nih an duhning cio in an khiah ko. 8:30am in kai thokmi zong an um i 9am in thokmi zong an um, khuami duhning cio asi.

“CDF nih khuakip caah saya/ma 140 kan hlanmi hi khua cheukhat ahcun an i zat deuh lo caah khuami nih an thiam ning cio in anmah tein an i hlan chih hna, zaanghleicawi in cachimmi zong an um. Mah vialte fonh chih ahcun Zophei tlang khua dihlak saya/ma hi 270 leng an si.

“Textbook cu sianginn nih an ngeih ciami an hman cio hna. Tu kum cu lakhruak in tuahmi asi caah thla 6 chung, July tiang lawng kan kai lai.

“Mah hnu ah, kum 1 ah thla zeizat dah kan kai lai timi cu CDF le khua nupa hna nih ceih ṭhan asi te lai.

“Laica zong Tang 1 in Tang 10 tiang cawn kan i tim nain cawn awk textbook a um lo caah ramleng um kan mifim le caṭial thiam hna nih Laitlang kan fale theih awk ah a herh nan timi pawl Laica textbook kan tuahpiak ulaw kan duh ngaingai. Primary pawl hi cu CACC nih a rak chuahmi kha cawn khawh an si nain Middle le High Schools caah cun a niam deuh ngai.

“Kan ram uknak hi a ṭhat colh lo ahcun, hmai kum lei cun tu kum ah Tangcheu kaimi kha hmai kum ah Tang 1 kaiter tiin catang kaiter zong kan i tim. Cozah nih kan sianginn le catang kai termi hi a kan cohlan piaknak hnga kan mifim pawl nih NUG cozah zong kan chimhpiak ulaw kan duh ngaingai. Nain, Tang 10 pin cu catang kan kaiter kho lai lo,” tiah a chim.

Siangngakchia pawl cu sianginn nih an ngeih ciami Kawlram textbook an cawng ko nain Myanmar cozah chuahmi thluak ṭawlnak Kawlca Textbook le Tuanbia Textbook cu an cawng lo. Nain, Kawlram chung ummi kan si bang Kawl holh/ca cu thiam a herh caah adang tein Kawl holh/ca cawnnak an tuah.

CDF-Zophei hi ralkap/hriamnam lawng si loin Zophei tlang khua 22 ah mipi herhmi vialte;

  1. Ngandamnak,
  2. Fimcawnnak,
  3. Mipi Ukhruainak,
  4. Ralkap, tbk in Department 7 a ngei.

Zophei tlang chung mizaw cu CDF-Zophei budget ting 50 hrambunh in Zophei tlang chung sibawi le nurse pawl nih manlo in an thlop hna i sii man (mizaw dang ca sii cawk ṭhannak) lawng an lak hna. Hnu cun Zophei tlang khuakip ah mizaw zohnak sekhan on silole va tlawn i mizaw zoh (mobile clinic) khawh peng dingin timhtuahnak an ngei. CDF ralkap pawl cu sii man zong lak loin an thlop hna. Sii le thilri cu Aizawl ah an cah.

Hmai zarh cun Zophei tlang khua 22 i kum 65 cung paoh COVID-19 raikhamsi an chunh hna lai. CDF ralkap pawl zong hi khua kip ah aa choklet pengmi an si caah anmah zong COVID an ngeihnak hnga lo le an palnak khuami zong an chawnhnak hnga lo an chunh ve hna lai.

Zophei cu Thantlang peng khua 15;

  1. Congthia
  2. Vuangtu
  3. Zabung
  4. Hlamphei
  5. Kuchah
  6. Phaikhua
  7. Ngalang
  8. Lawngtlang (A le B in khua 2 um)
  9. Tluangram (A + B)
  10. Hriphi (A + B)
  11. Zephai (A + B)
  12. Hmawngtlang
  13. Leitak (Modern + Zipi + Siapanglai)
  14. Aibur le
  15. Khuabung (A + B) an si.

Nain, khua 5 cu khua hlun le khua thar (A le B) tiin khua 2 an um i Leitak cu Modern, Zipi le Siapanglai tiin khua 3 um caah Zophei khua dihlak khua 22 an si.

Sinain, ramleng ahcun khua hlun le khua thar ti um loin khua 1 in an dir dih caah ‘Zophei khua 15’ ti deuh in an hman.

CDF-Zophei caah Malaysia um Zophei tefa nih RM113,000 leng (Kawlram ting 500 leng) an thawh

CDF-Zophei caah ramkip um Zophei tefa nih ting thong 17 (1.7 billion kyats) leng an thawh

Awṭha Bawi Min Lian le a chungkhar nih CDF-Zophei caah $5,000 an hlut

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...