CDF-Thantlang nih, “Kan ngaih a chia tuk hringhran!! Nan ṭuanhawi nih a taang mi dothlennak rian kan rak pehzulh lai,” tiah December 8 ah Thantlang khua ah a nunnak liammi CDF paralṭha 3 kong tuni ah ngaihchiatnak cathanh a chuah.
CDF-Thantlang chungtel a simi Ram Lian Peng, Bawi Za Uk le Van Tha Ceu hna cu uknak firtu Myanmar ralkap nih December 8 ah Thantlang khua AG biakinn pawng inn duah an timh lio ah an va fuh hna i an thah hna hi si.
Ralhrang Myanmar ralkap nih redi tukin an rak bawh cia cang hna caah atu bantuk thil an tonnak hi si. An hawile minung 4 zong ralhrang nih an hliam chih hna.
CDF-Thantlang nih, “Ram le miphun caah rian a ṭuan cuahmahmi Ram Lian Peng, Bawi Za Uk le Van Tha Ceu nih a kan liamtakmi cungah tantakmi chungkhar nan ngaihchiatnak kan in hrawmpi hna,” ati.
“An lungthlitum a simi ralhrang tei in Federal Ram sernak caah a taangmi dothlennak rian cu an ṭuan hawi CDF-Thantlang chungtel dihlak nih kan rak pehzulh lai.
“Dothlennak caan chungah ram le miphun caah nan i pumpeknak le nan rianṭuanmi vialte cungah CDF-Thantlang nih a sangbikmi upatnak kan in pek hna,” ati.
