CDF nih ‘Kawl Ralkap 165 kan thah cang hna’ ati

- Advertisement -

April 24 in nizaan June 11 tiang, ni 49 chungah Kawl Ralkap 165 kan thah cang hna, tiah Chinland Defense Force (CDF) nih a thanh.

“Mah pinah, 123 kan hliamh hna. Kanmah CDF lei in minung 30 an thi ve i 45 hliam an tong ve. Mipi 9 an thi i 4 hliam an tong ve,” ati.

Kawl Ralkap nih cun anmah lei a thimi le hliam tongmi cazin a langhter lo caah CDF nih aa chimmi pin cu adang theih khawh asi lo.

A thimi

Tlangpar ah tlakmi Mindat khuami nih April 24 ah hlan lio ram vaihnak Lai meithal in palik sakhan an kah hnu in Chin state ah kahdohnak aa thok. Palik nih tlaihmi sandahpiahmi khuami 6 an thlah duh hna lo caah khuami (CDF-Mindat) nih an kah hna nak asi.

Mah hnu cun, Chin state peng kip ah khuami hna nih uknak firtu Kawl Ralkap ral in i vennak Chinland Defense Force (CDF) an dirh cio.

Chin state peng 9 lakah peng 6;

  1. Kanpetlet
  2. Mindat
  3. Hakha
  4. Thantlang
  5. Falam le
  6. Tedim ah Kawl Ralkap le CDF i kahdohnak a chuak cang.
Hliam tongmi

I kahdohnak ah, khua mipi runvennak CDF ralkap pawl cu hlan lio inn-ser ramvaihnak puahceh le thal pak an hman. Kawl Ralkap pawl cu chanthar hriamnam ṭhaṭha; bomb, miakpi, RPG le automatic meithal an hman pinah cunglei in bawmtu vanlawng tiang an hman.

Nain Nilini lawngah, Hakha le Thantlang peng kahdohnak ah CDF nih Kawl Ralkap 27 an thah hna. Adang ceilak an hliamh chap hna.

Thantlang peng Khuahring Tlang ah kahdohnak a chuah caah pawngkam khuami 1,000 leng nih an inn le khua ramtang ah an zaamtak cang.

Kan hnu Zarhpini ah, Mindat pengah CDF nih Kawl Ralkap 50 hrawng an thah hna. Kawl Ralkap pawl nih Chin ralzaam umnak khuate pawl luhhnawh an timh caah CDF nih an kah hna.

Ralkap tamtuk an thih caah, sahrang Kawl Ralkap nih CDF cu raltuknak vanlawng in voi 2 tiang a kah hna. Mindat peng kahdohnak ah, Kawl Ralkap nih Mindat um ralkap battalion No. 274 le Kyauktaw um miakpi ralkap a hman hna. CDF cu bomb le miakpi tiangin an kah peng hna.

CDF-Mindat nih, “Kawl Ralkap nih chemical hriamnam a hman lengmang. An kan kahnak miakpi zenthong le nehnang a um lo buin CDF ralkap pawl an lungmit i lungfim loin an um tawn,” an ti – chemical hriamnam cu vawlei cung khuazei hmanh ah hman lo dingin UN nih nawl a chuahmi si.

Minung 25,000 hrawng an umnak Mindat khua cu May 12 ah Kawl Ralkap nih a lak caah minung thong tampi nih an inn le khua an zaamtak cang.

Atu hi, cunglei Kawl Ralkap nih bawmtu ralkap a thlah chap hna i Mindat peng Chin ralzaam umnak khuate pawl luhhnawh an timh liopi asi.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...