Nizaan January 13 zingka 9am hrawngah Mindat-Matupi lam ah CDF-Matupi le ralhrang Myanmar ralkap an i kap.

“Ralhrang 1 kan thah i, adang 3 kan hliam hna,” tiah CDF-Matupi nih a chim.

“Kanmah lei cu hliam tongmi le thimi kan um lo,” ati.

Nai hrawng cu Matupi peng ah ral a fah tuk lio asi. CDF le CNA nih ralhrang an tei tuk hna caah Kawl lei (Magway ramthen, Kyauktoo khua in) ralkap tampi cu tank 2 le ralkap motor 90 hrawng in an thlah chap hna.

Kyauktoo in Mindat khua an phan lonh cang i atu hi Mindat – Matupi lam tantim ah an um lio asi.

Matupi peng khuate tampi cu ralhrang nih an luhhnawh i khuami vialte nunnak kawl in ramtang ah an zaam hna. Bawmh an herh tuk.

Ralzaam 10 cu ralhrang nih an tlaih thah hna. An thah hna ning hmanh a chiakha ngai. Namte in an hrom an sah hna, an ruak zong voi tampi an ciktan dih.

Khua 3; Kace, Kihlung le Tipaw khua cu khuami nih an zaamtak dih cang. Ralhrang nih an inn an baoh hrawh piak dih hna i rawl le man ngei vialte an firpiak dih hna.