Nai hrawng cu Chin state ah Chinland Defense Force (CDF) le uknak firtu Kawl Ralkap i kahdohnak a fah caah Chinmi a zaza nih Mizoram lei panh in an inn le khua an zaamtak.
Chin ralzaam tampi cu Mizoram cozah nih a luhter duh hna lo caah ramri ah lungrethei thinphang in an i tap, tiah Zonet nih a thanh.
Mizoram state Tuipuiral Group YMA president Pu MC Lalramenga nih, “Mizoram state Zaphai peng ah ralzaam 60 hrawng an phan cang,” tiah a chim.
Pu K.Lalmuankima Farkawn (joint YMA president) zong nih, “COVID-19 zawtnak ruangah cozah nih ralzaam pawl cu Mizoram luh a sian hna lo nain, tarnu tarpa le fano ngei nu 100 fai cu an luhter ko hna,” tiah a chim ve.
“COVID-19 pulrai ruangah, hmasa bantukin khualtlung bantukin luhter awk an ṭha ti lo. Ralzaam chiahnak hmun zongah an i tlum ti lo caah apoi ngai.
“Chin state ah hitin ral aa peh ahcun, Chin ralzaam tampi ka lei hin an hung zaam kho. Cucaah, ralzaam pawl umnak caah Farkawn, Chawngtui le Vaphai ah ralzaam buk sak kan timh lio asi,” ati.
CDF le Kawl Ralkap cu Thantlang peng Khualhring Tlang zongah nai khan fak ngai in an i kap. CDF nih Kawl Ralkap 17 an thah hna.
Mah an i kahdohnak ruang ahcun, Khualhring Tlang khuate a zaza nih an inn le khua ramtang ah an zaamtak pinah, adang tampi Mizoram lei ah an zaam.
Mizoram state hrambunh media Zonet nih, “February 1 thokin Mizoram ah a hung zaammi ralzaam 15,000 leng an si cang,” tiah a langhter. — Khonumthung
