Tuni ah CDF le CNF i funtomnak bu ‘Chinland Joint Defense Committee (CJDC)’ nih Zomi Revolutionary Army (ZRA) duhlonak cathanh an chuah.
Ramchung hmanh ah hrambunh ngam loin India ram, Manipur ah hrambunhmi Zomi Revolutionary Army (ZRA) nih Chin state ah hrambunhmi PDF-Zoland hruaitu Pu Cin Sian Sum, kum 38 cu December 5 ah minung lo bang chiakha taktak in an thah.
Pu Cin Sian Sum cu Min Aung Hlaing le a ralhrang pawl nih mipi cozah uknak an chuh thokin asi khawh chungin PDF-Zoland ah a cawlcangmi dothlennak hruaitu asi.
ZRA cu ralhrang Myanmar ralkap dohnak ah ai tel lo pinah Chin state chung, ahlei in Tedim peng hmun tampi ah dothlennak a tuahtu phu pawl hnahnawhnak a pek peng hna.
Mah pinah, kanmah kan miphu cungah ralhrang bantukin minung lo bang thahnawnnak, hnahnawhnak a tuah lengmangmi hi CJDC nih fak piin duhlonak kan langhter.
CJDC (CDF, CNF, CNDF) nih cun uknak chuttu Myanmar ralkap le amah he aa bawmmi bu paoh cu nan hram bongh tiangin kan in doh hna lai.
