CNA ralkap 150 le CDF ralkap 150 nih nizaan September 10 zingka 5:30am ah Thantlang peng, Lungler khua SAC ralkap sakhan an kah i an lak hnik nain SAC nih vanlawng in a kah hna caah an la kho thlu rih lo, tiah CNA nih TOI sinah an chim.
An i kah tlawmpal ah SAC nih Kawlrawn lei in ralkap vanlawng le helicopter in a hung kahmi hna cu ramri um Mizoram, Thingsai khuate in kan hmuh khawh, tiah Thingsai khuate ah ummi palik nih TOI sinah a chim.
“SAC nih bomb voi 6 in a kan kah,” tiah CNA/F biachimtu Salai Htet Ni nih CCNC sinah tuni ah a chim.
“Lungler khua ralkap sakhan cu kan ṭhiam/tei hnik ko cang nain kanmah lungduh in kan uk thlu rih lo. Hnu ah tling deuh in official in thawng kan thanh te lai.
“CNF/A nih vanlawng kahnak kan ngeih rih lo caah SAC ralkap vanlawng cu an hung zuang ko nain kan kap kho lo,” ati.
Lungler khua ralkap sakhan hi tlangbo bakah ummi si caah lak a har ngai. SAC ralkap 30 hrawng an umnak asi. CNA/CDF nih an uk khawh thai ahcun tampi san a tlai lai. Ral tuknak le SAC lam phihnak caah hmun rem tuk asi.
CDF lei in hliam tongmi an um pah tiah kan theih, nain anmah nih thawng an thanh rih lo caah a dikthlir chim awk ṭha rih lo. Lungler khua um Methodist Biakinn zong SAC nih bomb in an kah hrawh.
Lungler khuami vialte cu nunnak kawl in Ralpel khua lei ah an zaam dih hna. Mi tampi cu Mizoram ah an lut.
Chinmi 10,000 leng Mizoram ah an zaam cang
Nizaan le tuni ah Lungler le pawngkam khuami Mizoram ah a zaammi zat fehter khawh asi rih lo, nain anmah hlan ah Chinmi 10,000 leng Mizoram ah an zaam cang.
NUG nih September 7 ah rampumpi ah SAC doh dingin D-Day a thanh hnu in nizaan tiangah Thantlang peng khuate mi 200 leng Mizoram ah an zaam chap. Mah chung ahhin nizaan Lungler khua ral ruangah a zaammi an i tel rih lo.
Mizoram Home Minister Lalchamlian nih, “August 28 tiang ahkhan Myanmar rammi 10,229 leng Mizoram ah an hung zaam cang,” tiah Mizoram Hluttaw meeting tuah lio ah a chim. An dihlak ngawt in Chinmi lawngte an si.
Champhai district bawi changtu Maria CT Zuali nih, “September 8 (Nithumni) ahkhan Chin ralzaam 35 leng kan district ah an hung zaam,” tiah a chim.
Hnahthial district bawi changtu H. Dolianbuaia nih, “Nilini thokin tuni tiangah kan district ah Chin ralzaam 60 leng an hung lut ve,” tiah a chim ve.
“Nizaan, Ningani zingka ah Lungler khua ah an i kahdohmi meithal le bomb thawng cu Thingsai khuate in kan theih len. Thingsai khua hi ramri ah ummi si i Lungler he aa hlat tuk lo.
“Kan district chung ahhin Chin refugee 700 hrawng an um cang. A ra laimi ni tlawmpal chungah tampi an hung zaam chap rih men lai,” ati.
Thingsai khuate lawng ahhin Myanmar ralkap nih uknak a fir thokin atutiang ah Chin refugee 200 leng an um cang. Khuami le khua cozah nih Chin ralzaam umnak caah sangthar an samh i inn an sakpiak hna (hmanthlak). Electric free in an hmanter hna. Ti le rawl an pek hna. Cheukhat cu an chungkhat sinah an um.
Lawngtlai district cozah rianṭuan pakhat nih, “Liamcia ni 2 chungah kan district ah Chin refugee 60 leng an hung zaam ve. NGO nih buk an sakmi ah an um hna,” tiah a chim.
Nithumni lawng ahkhan Chin refugee 32 leng Lungpher khuate ah an lut. Adang 22 zong Lawngtlai district chung khuate pakhat ah an lut ve, tiah Lawngtlai hrambunh Central Young Lai Association (CYLA) President H C Vanlalruatpuia nih a chim.
“Nilini le nizaan Ningani zongah Chin refugee tampi an hung zaam nain zeizat sat dah an si timi fiang tein kan hngal kho rih lo,” tiah a chimchap.
Atu lio Mizoram ah aa dormi Chin ralzaam 10,000 leng chung ahhin Chin MP 20 leng an i tel ve. Chin State Cozah hruaitu Salai Lian Luai zong aa tel ve. A dang cu CDM a tuahmi cozah rianṭuan le ṭihphan ruangah a zaammi mipi an si hna.
