Bungzung khua ah Kawl ralkap le palik 20 hrawng kan thah hna, tiah CDF-Hakha nih tunai ah a thanh.

“June 29 zingka 5:40am in 11am tiang Chin state, Hakha peng, Bungzung palik sakhan um palik le ralkap cu CDF-Hakha he kan i kap.

“Kan ral 20 hrawng kan thah hna. Kanmah CDF lei cu a thimi an um lo. Minung 1 balte hliam a tong nain a nunnak caah thinphang asi lo,” ati.

Falam zongah Kawl Ralkap 20 an thah hna

Chinmi that dingin Kalay peng Natchaung in Falam lei a rami Kawl Ralkap cu nizaan June 29 zingka 7:30am ah Waibulah khua pawngah CDF-Falam (CNDF) nih an kah hna i 20 an thah hna pinah, tampi an hliamh hna. Suimilaam 2 chung hrawng an i kap.

CDF-Falam (CNDF) lei in Chin paralṭha 4 nih an dawtmi Chin miphun le ram caah an nunnak an pek ve.

CNDF chungtel 3 zong hliam an tong, nain an nunnak caah thinphang asi lo.

“CNDF kan umnak hmun pakhat cu Kawl Ralkap nih kah dingin hriamnam ngan pipi he a kan luhhnawh caah i vennak caah kan kahmi hna asi,” tiah CNDF (CDF-Falam) nih a thanh.

Nizaan lawngah Chin state ah CDF nih Kawl Ralkap 40 an thah hna.