CBCUSA: CDM a tuahmi cu kan si khawh chungin kan in bawmh peng hna lai

- Advertisement -

US ram i Chin baptist khrihfabu 112 fonh Chin Baptist Churches USA (CBCUSA) nih, “ralkap duhlo langhternak (CDM) a tuahmi kan miphun hna cu kan si khawh chungin kan in bawmh peng hna lai,” tiah thawng a thanh.

CBCUSA hruaitu Rev. Dr. Thlaawr Bawihrin nih tuni ah video in thawng a thanh i, “CDM tuah hi ram le miphun dawt asi,” tiah a chim.

“CMD nih aa tinhmi cu Kawlrammi vialte kan hmailei hrawh a timtu ralkap uknak hrawh, mipi thimmi cozah (mipi cozah) ser, 2008 phunghram hrawh le federal democracy ram ser asi.

“Kan hmailei a hrawktu minung he cun i komh lo le rianṭuan ṭi lo a ṭha.

“Zung kai lo hi ram le miphun dawt asi. Atu hi Kawlram cu cozah a um lo. Cucaah cozah cu nangmah kha na si, mipi kha nan si.

“Asi khawh chungin zungkai lo i zuam cio uh. Kan si khawh chungin kan in bawmh hna lai.

“Minung hi hnulei caah kan nung lo, hmailei caah kan nung. Ralkap cu kan hmailei caah rian an ṭuan lo. Hnulei ah a kan kirpi. Cucaah kan hmailei ruat bu tein rianṭuan hna usih.

“Cucaah, cozah zung a kaimi le ralkap cozah uknak tangah rianṭuanmi an um ahcun khua ruat hraam ko usih tiah kan sawm hna.

“CBCUSA nih asi khawh chungin kan in dirkamh hna. Vawlei cung Chin miphun vialte nih kan in dirkamh hna.

“Atu cu Vawleipumpi CDM Dirkamhtu Bu (Global CDM Supporting Team) kan dirh cang. Global CDM Supporting Team nih rianṭuan loin ummi vialte nan nunnak ṭuanvo kan in lak hna lai. Hmailei nunnak caah phang hlah uh.

“CDM ka luh ahcun hmailei khuasak tintuknak … timi kong phang hrim hlah uh.

“CDM a dih tikah zung nan kai lomi vialte zong lahkhah pek nan si dih lai. Lahkhah nan thoh lomi zong pek nan si dihte lai. Atu nan rian hi pek ṭhan dih nan si te lai.

“A caan lio te ah CDM hmang in Kawlram pumpi thlen caan asi. Hi thlen caan liote ahhin kan dihlak i tel hau.

“Palek zong nan rian kaltak uh. Palek nan ṭuan lio i lahkhah nan hmuhmi nakin tam deuh kan in pek hna lai.

“GAD zung rianṭuanmi, Falam auhchohzihmu, Kanpetlet auhchohzihmu, Kalay auhchohzihmu, na rian in chuak law miphun lei ṭang.

“Cu bantukin, Chin state pengtlang kip i cozah rianṭuan vialte hna zong Bawikhrih min in kan nawl hna. Kan Chin miphun min in kan nawl hna. Federal min in kan nawl hna. Nan rian kaltak uh, federal kan hmu lai, mah tein uknak kan hmu lai.

“Thla 1 thla 2 ca ruat hlah, a ra laimi hmailei caan saupi ca ruat, na fale ca ruat. A ra laimi techin fapar ca tiang ruah bu tein nung usih.

“Vawlei cung Chin miphun vialte nih kan in dirkamh hna. Hnulei tolh hlah uh, hmailei fong chin uh!,” ati.

US Chin baptist khrihfabu 112 (CBCUSA) nih Chin state CDM caah $100,000 (dollar ting 1, Kawlram ting thong 1 le ting 400) an kuat cang. A rauh hlan ah Kawlram ting thong 4 hrawng kuat rih an timh. Mah tiang lawng si lai lo, CDM a dih hlan lo an kuat peng hna lai.

Gofundme zongah CDM caah tlawmhalnak an tuah. Ramdang ummi paoh nih mah hi hmet law ti khawh tawk cio in pek khawh asi. Atutiang ah $26,500 (Kawlram ting 400 dengmang) a chuak cang.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...