22.1 C
Hakha
Saturday, October 23, 2021
- Advertisement -

Ṭial Tharmi

CBCUSA nih Pastor Cung Biak Hum thah a tonmi kongah hitin cathanh a chuah

Thantlang ah uknak firtu cozah ralkap nih Pastor Cung Biak Hum an kah thahmi le Thantlang le Hakha ah inn tampi an khanghmi kongah, Chin Baptist Churches USA (CBCUSA) nih fak piin duhlonak le US cozah sinah bawmh halnak cathanh a chuah.

CBCUSA nih, “September 18 ah cozah ralkap pawl nih bomb in Thantlang khua ah inn 18 le hotel 1 an kah khangh hna caah mei thah aa thawhmi Pastor Cung Biak Hum an kah thah. Thantlang Centenary Baptist Church ah pastor a ṭuanmi si,” ati

“An thah pinah a kutdong an tan i a nupi ṭhitnak kutdonghrolh le phone an lakpiak, hi bantuk cu minung tuahsernak zong asi lo.

“Mah ni ṭhiam ah cozah ralkap nih Hakha ah inn 2 bomb in an kah khangh rih.

“Thantlang khuami vialte cu an dihlak ngawt in pawngkam khuate le Mizoram ah an zaam dih cang.

“September 14 zongah, cozah ralkap nih Thantlang um Johnson Memorial Baptist Church (JMBC) biakinn bomb in an kah. Mah biakinn hi uknak firtu Ralkap Bawi Ne Win nih kum 1966 ah a rak tlaih i US ah a khirhmi, Chin state ah hnubik a rami American Baptist missionary Rev. Dr. Robert Johnson philhlonak caah an sakmi asi.

“Mindat le Chin state hmun dang tampi zongah hitin Kawl Ralkap (cozah ralkap) pawl nih biakinn tampi an hrawh hna. Kachin le Karenni state zongah an hrawh hna.

“Mah kong he pehtlai in US ram state 30 lengah a ummi Chin khrihfabu 100 leng i funtomnak bu CBCUSA nih atanglei bangin cathanh kan chuah:

“1. Pastor Cung Biak Hum an thahmi le Thantlang le Hakha ah biakinn le mipi inn bomb in an kahmi, minung tuahsernak hmanh a lo lomi tuahsernak hi CBCUSA nih fak piin kan duhlonak kan langhter.

“2. “Baptist pastor an thahmi le Thantlang ah inn bomb in an kahmi nih hin uknak firtu cozah ralkap pawl nih Myanmar mipi ni fatin hell tla bantukin an hrem pengmi hna kha a langhter. Vawleipi nih mah kong hi ṭha tein a ngaih herh. Ahlei in vawleipi nih hma a lak herh,” tiah UN Special Rapporteur Tom Andrews nih a chimmi kha CBCUSA kan lungtling. Hitin Burma ram ah cozah tlaitu nih Chin le miphun dang a kan hremmi hi donghter dingin hma kan lakpiak uh tiah ramkip, ahlei US kan in nawl hna.

“3. Chin state le Burma ram ah biaknak zalonnak le nuhrin covo ngah dingin aa zuam cuahmahmi Chin mipi le Burma mipi hi CBCUSA nih kan in dirkamh hna, cun Chin le Burma ah daihnak le tlukruannak a len khawhnak hnga vawlei pumpi Chinmi vialte thlacam kan in sawm hna,” ati.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -