Hakha ah avoi 1nak bik Covid-19 mizaw hmuhmi Tiphul nu (Case 150) pawngah an rak um ruangah Hakha University ah adang tein chiahmi (quarantined) minung 51 chungah 48 cu May 20 ah inn an ṭinter cang hna.

Zawtnak ngeimi pawngah a ummi pawl cu zawtnak an ngeih ve sual cun mipi an chawnh sual hna lai tiin ni 21 chung hmun dangte ah chiah an si. Mah chungah zawtnak an ngeih lo ahcun thlah an si.

Hakha Sizung lutlai Dr. Mang Biak Kung nih, “Hakha University ah chiahmi pawl lawng an ṭinter hna. Leng chuak loin an inn cio ah ni 7 chung umter an si rih lai. An dihlak in ṭinter an si lai nain minung 3 balte cu thaizing kiptuh hrawngah ṭinter an si lai,” tiah a chim.

Minung 51 chungah Tiphul khuami 22 le Hakha khuami 26 cu May 20 zingka 11am ah cozah nih inn a ṭinter hna.

“Mawṭaw in a kan thlah lai. Tiphul khuami cu an khua tiang an thlah hna lai. Hakha ummi cu mahle inn cio ah si lai,” tiah ṭintermi pakhat nih a chim.

Atu hi Hakha University ah chiahmi minung 20 hrawng an um rih tiah theih asi. Chin state ah Covid-19 mizaw pawng an rak um ruangah cozah nih hmun dangte ah chiahmi 100 hrawng an um, tiah cozah rianṭuan sin in kan theih.

Charhchan: Chin World

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...