Cambodia ram hruaitu Prime Minister Pu Hun Sen cu hmai thla January ah lainawng Min Aung Hlaing bawmh dingin Myanmar khualipi Naypyitaw a tlawng lai.
Naypyitaw ahcun uknak firtu Myanmar ralkap bawizik Min Aung Hlaing he tonbiaruahnak an ngei lai. Hmailei ah ASEAN le Myanmar uknak firtu ralkap cawlcanghnak ding kong an i ceih lai.
Myanmar ralkap Ramdang Vuanci Wunna Maung Lwin nih Nihnihni (Dec 7) ah Cambodia a tlawn lio ah Myanmar ram tlawng dingin a sawm caah January 7 in 8 tiang tlawn aa timh hi si.
Lainawng bawmh aa timmi Cambodia PM Hun Sen nih, “Cambodia a hung tlawngmi Myanmar ralkap Ramdang Vuanci he cun ASEAN ah Myanmar ai teltum khawh ṭhannak ding le i rualremnak ding kong kan i ruah. Mah hnu ah, Myanmar ram tlawng dingin hruaitu Min Aung Hlaing nih an sawm aa ka ti,” tiah Facebook ah a tar.
Myanmar ralkap bawizik Min Aung Hlaing le a tapeh pawl nih February 1 ah mipi thimmi cozah uknak an chuh thokin ramdang hruaitu hohmanh nih Myanmar ram/ralkap cu an tlawng duh lo. Cambodia PM lawnglawng hi tlawn aa timmi asi.
Hmai kum cun Cambodia ram hi ASEAN Chairman a ṭuan ding si. Atu lio ASEAN Chairman Brunei nih cun Min Aung Hlaing cu Myanmar mipi thahnawn a ngol hlan lo ASEAN meṭing kaiter lo dingin a hnon.
Cambodia PM nih cun “Myanmar (Min Aung Hlaing) cu ASEAN member asi caah ASEAN meṭing kainak nawl a ngei (kaiter ding asi)” tiin nizaan tihni ah a chim. A kaiter taktak te lai maw tiah US le ramdang pawl nih an ngiat cio te lai.
April thla ah Indonesia ram ah ASEAN meṭing an rak tuah i Min Aung Hlaing zong an rak kaiter ve. Mah lio cun ‘Myanmar ram daihnak caah…’ tiin ASEAN nih tuah ding 5 bia an rak khiah. ASEAN palai Myanmar ram ah tlawnnak nawl pek in kap hnih hruaitu pawl he Myanmar ram daihnak caah cabuai cung biaruahnak tuah ding, timi zong aa tel. Min Aung Hlaing nih tuah dingin ka lungtling ko, a rak ti ve.
Sinain, Min Aung Hlaing nih ASEAN palai (Brunei Ramdang Vuanci changtu) cu Aung San Suu Kyi tonnak nawl kan pe lai lo ati caah atutiang Myanmar ram a tlawng duh lo… cucaah Min Aung Hlaing cu ASEAN biachahmi 5 a tuah hlan lo ASEAN meṭing kaiter lo dingin bia an rak chahnak asi.
Min Aung Hlaing nih uknak a chuhmi mipi thimmi President U Win Myint le Ram Ruahnak Petu Daw Aung San Suu Kyi cu ‘buainak tuah dingin mipi nan forh hna’ ti le ‘2020 thimnak tuah lio ah COVID-19 zulhphung nan buar’ tiin kum 4 veve thong a thlak hna. Mah zaan lila ahcun ‘ka ngaihthiam hna’ tiin kum 2 ah a ṭhumhpiak hna.
A taangmi ASEAN chungtel ram 9 nih cun, “October thla ASEAN meṭing le kan hnu thla Asean-China special meṭing ah Min Aung Hlaing le tapeh pawl kainak nawl kan in pe hna lo, Myanmar ram aiawhtu ding ahcun ramkheltu asi lomi lawng rak thlah hna uh…,” tiin Min Aung Hlaing cu an ti. Nain Myanmar aiawh in hohmanh an kai lo.
Meṭing kainak nawl an pek lomi cu uknak firtu Min Aung Hlaing le a tapeh pawl an lungrawk ngai i phunzainak cathanh zong an rak chuah.
Kan hnu thla ah Cambodia hruainak in Asia-Europe Zoom meṭing an tuah lio zongah Myanmar cu an kaiter lo.
Nain, Cambodia PM Hun Sen nih Nikhatni ahkhan, “Myanmar cu ASEAN member asi caah ASEAN meṭing kainak nawl a ngei,” tiah a chim caah kaiter a duh ti a lang.
“Myanmar ram hruaitu Min Aung Hlaing he rian ka ṭuanṭi lo ahcun ho he dah ka ṭuan ṭi lai?” tiah Min Aung Hlaing he rianṭuanṭi (bawmh) aa timhnak kong zong a chim.
