Buainak a Chuahpimi Cu aa Ka Ṭanhtu Nan Si Lo: Trump Thawngthanh

US President Donald Trump nih tunai ah White House Facebook page in video in thawng a thanh.

“Kan hnu zarh i Hluttaw buainak nih kan rammi nuai tampi an thin a hunter tuk hna. Fiang tein chim ka duhmi cu, mah buainak kha ka pom hrimhrim lo.

“Buai le thil hrawh cu kan ram ah kan cohlang naisai lo. Cun, kan cawlcanghnak zongah kan cohlang kho lo. Make America Great Again kan timi cu upadi kilven, palek upat le, kan ram hmun pical le nunphung kilven khi asi.

“Mibu buainak cu ka saduhthah he aa ralkah tuk. Cun, kan cawlcanghnak le kan i tinhmi he zong aa ralkah tuk.

“Keimah aa ka ṭanh taktakmi nih cun zei tik hmanh ah ramkhel buainak tha an pe bal lai lo. Aa ka ṭanh taktakmi nih cun zei tik hmanh ah palek le a sunglawi tukmi kan thantar upat loin an um bal lai lo. Aa ka ṭanh taktakmi nih cun zei tik hmanh ah an phunhawi American pawl hna an hnawh hna lai lo i an tlerh hna lai lo.

“Mah hi nan tuah ahcun, kan cawlcanghnak tha nan pe lo, nan doh! Cun, kan ram nan doh zong asi. Kan zohsawh kho lo. Buainak cu zeiti hmanh in i silhnalh khawh si lo. America cu upadi in hruaimi ram asi.

“Kan hnu zarh buainak ah aa telmi paoh cu, upadi ningin nan tuhmi theipar zunter nan si lai.

“Aa ka ṭanhtu vialte hna, kan ram ah huatnak zorter le daihnak lenter i zuam cio uh tiah kan sawm hna.

Sandahpiah aa Tim Rihmi Pawl Sin Biacah

“A ra laimi ni tlawmpal chungah hika Washington lawng si loin rampumpi ah sandahpiah rih an timh tiah thawng kan theih. Buainak a chuak kho men tiah Secret Service nih an ka chimh.

“Kan phunghram 1st Amendment nih an pekmi hna nan covo bangin, ahopaoh upat te le buai lo tein sandahpiahnak nawl nan ngei.

“Sinain fiang tein chim ka duhmi cu; buainak chuahpi hlah uh, upadi buar hlah uh, zei thil taktak hmanh hrawk hlah uh. Hopaoh nih kan upadi nan zulh hrimhrim lai, cun palek le nawlngeitu nawl nan ngaih hrimhrim lai.

“Sandahpiahtu pawl cu ningcang tein umter hna dingin rampi cozah zung vialte ka chimh dih cang hna.

“Buainak zeihmanh um lo tein [Joe Biden] sinah uknak kan pek khawhnak hnga, Washington khuapi him tein veng dingin National Guard ralkap thong tampi kan auh hna,” ati.

A sau cang caah, cun a biapi bikmi cu a tling ko cang i mah vial si rih seh. Mirang holh a fiangmi nih cun atang video ah tling tein ngaih khawh asi.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...