Breaking News: Trump cu Voi 2 Tiang Phuah Dingin Tazacuaimi US President a Hung Si

- Advertisement -

US Hluttaw Niam (House) nih tuni ah President Donald Trump cu phuah dingin taza a cuai (impeach) ṭhan.

2019 December thla zongah House nih phuah dingin taza a rak cuai cang. Hluttaw Sang (Senate) nih phuah lo dingin bia a rak khiah. Mah hi hmet law rel khawh si.

US ram dirhka in nihin tiang US president vialte lakah Donald Trump lawng hi phuah dingin voi 2 tiang tazacuaimi asi. A tuanbia a chia taktak.

Tuni ah House nih vote an thlak i MP/representative 232 nih “Yes” tiin an vote i 197 lawng nih “No” tiin an vote caah phuah dingin tazacuai a duhtu nih an tei hna. Democrat paoh nih cun “Yes” an vote dih.

Kan hnu zarh ah Trump nih US Hluttaw (U.S. Capitol) buai hnawh dinngin a ṭanhtu pawl a forh hna ruangah Hluttaw cu an baoh i Hluttaw chungah thisen a luang. Hluttaw palek pakhat an thah. Minung 5 an thi. Mah ruangah phuah dingin taza an cuai ṭhan hi si.

Kan hnu zarh thil cang hnu cun, a party Republican hmanh nih Trump cu an rem ti lo. Republican minung 10 bak nih phuah tazacuai dingin an vote ve. US tuanbia ah amah party bak nih phuah tazacuai dingin vote tambik asi.

Hluttaw Niam hruaitu Pi Nancy Pelosi (D) nih, “Trump cu phuah hrim a hau” tiah tuni Hluttaw meeting ah a chim. “Donald Trump cu kan dawtmi kan ram caah ṭihnung tukmi minung asi,” ati.

House i Republican hruaitu Pu Kevin McCarthy nih, “Hluttaw an baohmi kha cu Donnald Trump ruang bakah asi ko. Hluttaw an baoh cuahmah lio zongah kaa khat hmanh a mawhchiat hna lo,” ati.

Trump cu zeitik dah an phuah kun lai?

Hluttaw Niam (House) cu phuah dingin tazacuaitu lawng asi i a donghnak biakhiaktu cu Hluttaw Sang (Senate) asi. Cucaah, mah kong hi Senate ah an kuat lai i Senator pawl nih an vote ve lai. Phuah khawhnak ding ahcun cheuthum cheuhnih lungtlin a herh.

Senate i Democratic hruaitu Mitch McConnell nih, “Donald Trump cu a caan dih hlan hrimhrim ah kan phuah hau, Hluttaw meeting kan ṭhut colh hau,” ati.

Nain, Senate i Republican hruaitu Pu Chuck Schumer nih, “January 19 hlan ahcun Trump phuah/lo kong vote kan thla kho lai lo,” ati.

Trump cu January 19 tiang lawng US President asi cang lai, ni 7 lawng a taang cang. January 20 cun President-thimmi Joe Biden nih a ṭuan cang lai.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...