Wednesday, December 1, 2021

Breaking news: Sagaing ah ralkap le mipi an i kap, khuate 8 mipi an zaam cuahmah lio asi

Zahan zaan ah Monywa-Kalewa highway lamkam ah ralkap le mipi an i kah caah tu zaanlei ah ralkap nih Sagaing ramṭhen khuate pawl an luhhnawh i khuami a zaza nunnak kawl in an zaam cuahmah.

Nai hrawng cu Chaungma khuate pawng khuate tampi ah mipi le ralkap an i kap lengmang.

Khuami nih, “Tuni ah mawṭaw 15 hrawng in Chaungma le pawngkam khuate pawl ah ralkap an hung rat caah Chaungma, Kani le pawngkam khuate 6 (dihlak 8) nih khua kan chuahtak cuahmah,” tiah The Irrawaddy media ah an chim.

“Ralkap pawl cu Chaungma khua ah an um i duhlonak langhtertu an kawl cuahmah hna. Ralkap pawl nih dawr an luhhnawh. Khuami inn zong an luhhnawh i facang an chuh hna. Khuami ar zong an duhmi paoh an thah. Minung 2,000 hrawng an umnak Chaungma khuate le khaute dang 7 khuami pawl cu atu hi an zaam cuahmah hna lio asi,” tiah Kani khuami pakhat nih a chim.

Zarhteni zaanlei ahkhan, Monywa-Kalewa lam um Taungtwin Chaung khuate ah ralkap le mipi an i kap i mipi 2 an thi.

Kani khuami pakhat nih, “Kani le Mingin peng ramri pawng Monywa-Kalewa lamkam ah mipi nih ralkap an doh hna caah pa pakhat cu ralkap nih an kah thah. Adang pa pakhat cu ralkap nih an hmuh lio ah Lai meithal a ngeih caah hri in an ṭem i an kalpi. Hnu ah thi lakin an hrem tiah kan theih,” tiah a chim.

Tlangval pakhat zong a phei ah ralkap nih an kah i an kalpi.

Zahan zaanlei ah Taungtwin Chaung khuate ah mawṭaw 3 in a phanmi ralkap 60 hrawng cu khuami nih innser meithal in an doh hna.

Palek le ralkap lei zong an thi ve len, tiah theih asi nain fehter khawh asi rih lo.

Tuni ah i kahnak a chuak rih.

“Tu zaanlei (Zarhpini) zong Kani khua in meng 44 a hlatnak Monywa-Kalewa lam ah mipi vengtu ralkap (mipi) le ralkap an i kap rih. Ralkap nih miakpi hna an hman,” tiah Kani khuami nih a chim.

Kani, Yinmabin, Kale le Tamu peng ah mipi nih innser hriamnam (meithal, air gun, kutcheh bom) in ralkap an doh peng hna.

Khuami nih, “Mipi nih an kahmi hna cu cunglei nih ralkap tam deuh a hung thlahmi hna pawl kha kham an duh hna caah si,” tiah an chim.

Nilinni zongah, Kani khua ah mipi le ralkap an i kap i mipi 6 an thi. A thaizing (Ningani) ah Kani lam nganbik ah chah taktak in ralkap 100 hrawng an chiah hna. — The Irrawaddy [English version]

- Advertisement -