Updated: Mindat le Kanpetlet kar um Aye Sakhan khuate pawngah Kawl Ralkap le Mindat-CDF nizaan in tuni tiang an i kap. Kawl Ralkap nih hriamnam ngan in an kah hna caah Chin mipi 10 hrawng hliam an tuar. Tu zaanlei ah Kawl ralkap cu Aye Sakhan khuate lut in hmunhma an khuar kho cang, tiah Mindat khuami sin in kan theih.
Hmasa ṭialmi: Nizaan May 19 in tu zingka tiang Chin state Kanpetlet pengah uknak firtu Kawl Ralkap le khuami CDF an i kap cuahmah, tiah kan theih.
Kawl Ralkap nih hriamnam ngan le miakpi hna in an kah hna caah Kanpetlet khuapi ummi nih hriamnam ngan thawng voi tampi an theih.
Kanpetlet khuapi ahhin minung 5,000 hrawng an um. Acheu hrawng cu lamnai ramtang le khuate ah an zaam cang hna, tiah khuami sin in kan theih.
CDF-Kanpetlet nih zahan zaantlai hnu ah, “Kanpetlet pengah ral a fak kho men, mipi harnak nan tonnak hnga lo atu te hin a himnak hmun ah zaam cia uh, hmun dangin Kanpetlet peng a rami pawl zong a rannak in nan ratnak hmun ah kir dih uh,” tiin thawng a thanh hna.
Kawl Ralkap he an i kahnak kong balte cu CDF nih a thanh rih lo caah a thimi le hliam tongmi zat fiangin hngalh asi rih lo. A thanh tikah kan update ve te lai.
Chin mipi Pathian nih huhpheng ko hna seh, kan umnak hmun cio in thlacam piak hna usih. A zaammi hna le hartongmi hna caah kan si khawh tawk cio in ṭuanvo ngeitu upa te sinah bawmhnak pe cio hna usih. — Chin World le CDF
